Saratxoko saihesbidearen proiektua izan zuten hizpide atzo Arabako Batzar Nagusietan, Bide Azpiegituren eta Mugikortasunaren V. Batzordean. Aiaraldeko hainbat ordezkari politikok hartu zuten parte bertan: Idoia Aginako Urduñako alkateak, Josune Irabien Amurrioko alkateak eta Delikako, Tertangako, Artomañako, Aloriako, Lekamañako eta Saratxo Batzar Administratiboetako presidenteek.
Ordezkariak banan-banan igaro ziren bilkura-gelatik, saihesbidearen proiektuaren inguruan zuten iritzia plazaratu eta ahaldunen galderei erantzuteko. Idoia Aginako izan zen lehena hitza hartzen. Errepide horretan egondako “istripu andana” aipatu zuen, bide horrek Urduñaren komunikaziorako duen garrantzia azpimarratuaz. Horregatik, proiektua ahal bezain laster lizitatu eta gauzatzea eskatu zuen, “oraingo lege-agintaldia amaitu baino lehen”.
Delikako, Tertangako, Artomañako eta Aloriako ordezkariek ere nabarmendu zuten errepidean egondako “istripu kopuru altua”.
Josune Irabienek, bere aldetik, saihesbidearen “gaur egungo proiektuarekin” ados ez dagoela adierazi zuen. “Saihesbidearen aurkako mobilizazioetara joan naiz batzuetan, eta gaur egun ere joango nintzateke, badituelako gustuko ez ditudan zenbait kontu”, azaldu zuen Amurrioko alkateak. Errontondarena da aldatu beharreko elementuetako bat, Irabienen aburuz.
“Hormigoia lurraren gainetik”
Lekamaña eta Saratxoko ordezkariak izan ziren hitza hartzen azkenak. Tonu gogorra erabili zuten bi herrietako kideek. Obraren berri jaso ez izana salatu zuten Lekamañako bizilagunek, “Saratxoko batzar administratiboko kideen eskutik jaso dugu lehenbiziko informazioa”. Hortaz gain, planteatutako obra “makro-proiektua” iruditzen zaiela adierazi zuten.
Saratxoko ordezkariek “polizia onaren eta txarraren” papera egitea leporatu zioten Aldundiari. “Herriko pertsona nagusiak presionatu dituzte desjabetzeen paperak senideekin kontsultatzeko astirik eman gabe sinatzeko”.
Proiektuari dagokionez, saratxoarrek adierazi zuten ez dakitela Aldundiak alternatibarik aztertu duen: “ez digute inoiz balizko beste aukeren dokumentazioa aurkeztu”. Proiektuak herriko bizimoduan izango duen eragina nabarmendu zuten baita: “abeltzain batzuek euren bizimodua utzi beharko dute, ez dutelako lan egiteko tokirik izango”. Horregatik, “hormigoia lurraren gainetik” jarri izana tamaldu zuten saratxoarrek.
