Mendiko Lagunak taldeak hainbat hitzaldi eta proiekzio antolatuko ditu. Ekintza guztiak Amurrioko Katekesi aretoan gauzatuko dituzte, 19:30ean.
Azaroaren 17an Eñaut Izagirre Elgoibarko glaziologoa izango da Amurrion Patagoniako izotzen artean bizitako esperientziak azaltzen. “Incognita Patagonia” da aurkeztuko duen lanaren izenburua: Kartografia, alpinismoa eta ikerketa uztartzen dituen belaontzi bidaia.
Larunbatean, azaroak 18, alpinismoaren txanda izango da. Iker Madoz Iruñeako eskalatzaileak bere ibilbidearen berri emango du, hastapenetatik Andeetan edota Himalayan burututako azken proiektuetara.
Txangoa
Azaroaren 19an, aldiz, 11 kilometrotako txangoa antolatuko dute Larragorri mendi magaleko aztarnategi arkeologikoak ezagutzeko. Ibilaldia 09:00etan abiatuko da Done Erroke baselizatik eta Juanjo Hidalgo Laudioko historialariak gidatuko du.
Hurrengo ostiralean, azaroak 24, bideo-proiekzio batekin helduko diete berriz jardunaldiei. Luis Arrieta mendi-eskiatzaileak Skimetraje jaialdian saritutako “Bizi” film laburra aurkeztuko du. Arrietaren beste bi pelikula gehiago proiektatuko dira, aurrekoaren jarraipena den “Bizi II” eta ekoiztu duen azken proiektua: “Chamonix-Arolla”.
Azaroaren 25ean emango diete bukaera Mendi Jardunaldiei. Egun horretan bederatzi urtez luzatu zen mundu zeharreko bidaiaren berri ematera etorriko da Salva Rodriguez, Granadako zikloturista. Azkenik, XXI. Gorobel Ibilaldiko argazki eta bideo laburren sari banaketa egingo dute.
