Agate Deunaren bezperarekin batera kalera ateratzen dira Amurioko Kintoak, aurten noiz aterako zarete kantuan?
Asteburu honetan kalera aterako gara kantatzera igandean, hain zuzen. Goizean goiz denak elkartuko gara Amurrioko Plazan eta gero norberak dagokion ibilbideari ekingo dio.
Ibilbidean zehar Amurrioko auzo zein herrixketatik kantuz ibiliko gara eta, azkenik, Amurrion bilduko gara berriz azken kantua egiteko.
Zenbat gazte elkartuko zarete guztira?
Aurten 18 urte bete behar ditugun 87 gazte elkartuko gara.
Nola antolatuko zarete herriko auzo eta herrixka guztietatik igarotzeko?
Taldeetan banatuko gara eta talde bakoitzari Amurrioko zonalde bat dagokio, bertako herri, etxe, baserri, ikastetxe eta lantegiak bisitatzeko. Inor ez da gure kantuak entzun gabe geratuko!
Zer da zuretzat kinto izatea?
Kintoen jaia zerbitzu militarra egin aurreko ohitura bezala sortu zen. Lehen zuen intentzioarekin ados ez egon arren, gaur egun beste jai bat bihurtu da eta horrek poztasuna sortzen dit.
Azken finean, txikitatik nahi izan dugu bi egun hauek zuzenean bizitzea. Kintoak ikastolara heltzen ari zirela esaten zigutenean, urduritasuna eta poza sentitzen genuen, orain bizipen guzti horiek beste aldetik ikusteko irrikitan nago.
Agate Deuna igarota kintoen jaia ospatu ohi da Amurrion, aurtengo kintoek zer prestatuko duzue?
Kintoen jaia otsailaren 16ean ospatuko dugu, egun horretarako arratsalde-gaueko egitaraua prestatu dugu: 20:00etan Burrumba eleltrotxaranga, 22:00etan Aiaraldeko Soinu Sistema eta gauari amaiera emateko Dj Ruba.
