Gasteizko epaitegiak Tubos Reunidos enpresa zigortu du amiantoari lotutako 58 urteko langile baten heriotzaren ondorioz

Tubos Reunidos enpresako bi langile lantegira begira. / Aiaraldea.eus

Tubos Reunidos SA eta Tubos Reunidos Industriales SLU enpresek 65.017,6 euro ordaindu beharko dizkiete Jose Ignacio G. A.-ren senideei. Langilea 2012an hil zen 58 urterekin birikietako minbiziak jota. Gasteizko lan-arloko 3. epaitegiak Tubos Reunidosi leporatu dio gaitz horren ardura, amiantoarekin harreman zuzena izan baitzuen beharginak lantegian.

ASVIAMIE elkarteak zabaldu du epaia eta salatu du langileak galdategian betetzen zituela bere eginkizunak inolako segurtasun eta higiene neurririk gabe, Lan Ikuskaritzak berretsi zuen moduan. Jose Ignacio G. A. egoera horretan egon zen 1976tik 1983ra bitartean.

2007an lanerako ezintasun iraunkor arrunta eman zioten beharginari, nahiz eta amiantoa topatu zuten bere pleuran. 2011n birikietako adenokartzinoma diagnostikatu zioten eta, horregatik, lanerako erabateko ezintasuna kudeatzen hasi zen. Hurrengo urtean hil zen.

Gizarte Segurantzak aitortu zion lan gaixotasuna eta baita alargun pentsioa ere bere emazteari, baina Tubos Reunidos enpresak helegitea jarri zion erabakiari. Hala eta guztiz ere, Epaitegi Gorenak, hainbat epaitegiren artean, berretsi zuen zigorra.

Kalte ordaina erdira murriztu dute langileak erretzen zuelako
Edonola ere, ASVIAMIEk epaiaren oso balorazio kritikoa egin du. Izan ere, elkarteak azaldu du enpresak hainbat aitzakia jarri duela dagokion kalte ordainari aurre ez egiteko. Argudio horien artean zegoen langilea erretzailea zela.

Berez, senideek 143.038,81 euroko zigorra eskatu zuten enpresarentzat, eta epaileak erdira murriztu du, aintzat hartuta beharginak erretzeko ohitura zuela.

ASVIAMIEren aburuz, arrazoi horiek aintzat hartzea adar jotze hutsa da, enpresak ez baitzuen inolako segurtasun neurririk hartu urte luzez. Zentzu horretan, nolabait, epaileak langilea ere bere gaixotasunaren arduradun egin duela uste du elkarteak.

Erlazionatuak

Amiantoa, urteen poderioz azaleratzen den arazoa

Aiaraldea

Bere garaian amiantoarekin lan egitean babes neurriak ez hartzeagatik zigortu dute Laudioko Udala. Kepa Galdosen familiari 133.806 euroko kalte ord...

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide