.JPG)
Taldea gaztea da zuena. Nola sortu zen?
Betidanik egon gara jotzen hainbat taldetan, eta batzuetan elkarrekin jotzeko elkartu gara. Behin kontzertu baterako hiruroi deitu gintuzten, eta hortik aurrera deitzen hasi ziguten.
Taldea osatzea erabaki genuen, beraz. Berez, ondo pasatzeko ideiarekin sortu genuen, musikan emakumeon partaidetza bultzatzeko asmoarekin.
Zergatik Ilargiak izena?
Ilargiak gugan daukan indarra berebizikoa da. Emakumeon gidari eta zaindaritzat daukagu. Ez da bakarrik gauetan ikusten dugun hori, uneoro, nahiz eta ez ikusi, nonbait dago gure barneak astintzen. Horrexegatik gara ilargiak. Guztia astintzeko, indartzeko, eta, nola ez, orbita desberdina jarraitzeko.
“Guk bakarrik prestatutako lehenengo kontzertua izan zen greba feministakoa”
Greba feministan eskaini zenuten lehen kontzertua. Zer moduzko esperientzia izan zen?
Izugarrizko kontzertua izan zen guretzat. Guk bakarrik prestatutako lehenengo kontzertua izan zen, eta izugarri pozten gaitu jendeak gurekin musikaz gozatzea horrelako ekintza batean!
Zer nolako abestiak jotzen dituzue? Zer topatu ahalko du zuen kontzertu batera doanak?
Denetarik jotzen dugu, talde ezagunen bertsioak egiten ditugu, estilo desberdinetakoak -abesti lasaiak, azkarrak...-. Horrez gain, guk egindakoak ere abestera animatu gara batzuetan.
“Denetarik jotzen dugu, talde ezagunen bertsioak egiten ditugu, estilo desberdinetakoak”
Zer nolako ibilbidea egin duzue orain arte? Zer nolako harrera izan duzue jendearen partetik?
Orain arte egin dugun ibilbidea oso motza izan da, 4-5 kontzertu egin baititugu, baina gogotsu gatoz. Izan ere, ekainerako hainbat kontzertu egiteko prest gaude. Jendea gugan izan duen konfiantza berebizikoa izan da, eta izugarri gustatu zaigu gurekin uneoro izandako jarrera.
Baduzue abesti propio gehiago sortzera salto egiteko asmoa?
Lehen esan dugun moduan, bai, abesti propioak ere baditugu. Eta aurrerago, taldearekin zerikusia duen abesti bat egin nahi dugu, Ilargiak izenarekin.
Zer proiektu dituzue etorkizunari begira?
Hasi berriak garenez, momentuz ez dugu proiektu askorik buruan. Hala ere, kamiseta propioak egiteko ideia daukagu, gure proiektua ezagutzera emateko xedearekin.