Prentsa-oharra plazaratu zuen LABek atzo Tubos Reunidosek Trumpen muga-zergei aurre egiteko aurkeztutako neurrien harira. Sindikatuaren arabera, “langileen eskubideak murrizteko ahalegina” egin du enpresaren zuzendaritzak. “Enegarrenez, zuzendaritzak enpresa-batzordeari eskatu zion bere betiko bidetik doazen neurri batzuk ontzat emateko, langileon prekarietatea handitzea suposatzen dutenak, hain zuzen ere”.
LABen arabera, Aldi Baterako Enplegu Erregulazio Espediente bat ezartzearen aukera jarri du zuzendaritzak mahai gainean, 21 hilabeteko epea izango lukeena. Horrez gain, langileen “malgutasuna eta mugikortasuna” areagotzea eskatu du enpresak. Deslokalizazioan sakondu nahi izatea ere egotzi dio sindikatuak zuzendaritzari: “Tubos Reunidosen egin izan diren lanak kanpora atera nahi dituzte, etorkizun oso hurbilean Estatu Batuetara bidaltzeko”.
Plan hori bat-batean aurkeztu izana ere egotzi diote zuzendaritzari. Sindikatuak azaldu du iazko urritik hona 30 bilera baino gehiago egin dituztela hitzarmenaren harira, baina guztira ez dutela 8 ordu baino gehiago iraun. “Produkzio tona gehienak honezkero lantegitik atera direnean datoz neurriak proposatzera”.
Hurrengo bilera, astelehenean
Gauzak hala, LABek adierazi du “oso argi” duela zein den datorren astelehenean egingo duten bilerara eramango duen jarrera. Hitzarmena desblokeatzea eta negoziazio mahaian esertzea eskatuko diote zuzendaritzari, “langileontzako lan eskubideen murrizketarik izango ez duen plan industrial bat” exijitzearekin batera.
Horrez gain, enpresa-batzordeari eskatu diote egoeraren gaineko informazio gainontzeko langileekin partekatzea. Beharginei, aldiz, “eskubide guztiak” defendatzeko deia luzatu diete, “mobilizazioaren bidez”.
