Giroa tenkatuta dago Amurrioko Udalaren eta Herriarenak koadrilaren artean, herriko jaietako txupinazo ofiziala izateko egun bat baino gutxiago falta denean (Jai Herrikoien Aldeko Batzordearen egitaraua gaur goizean hasi da).
Prentsa-ohar bat plazaratu zuen udalak atzo, "gorabeherarik gabeko jai lasaien aldeko apustua" helarazteko. Ohar horretan, tokiko erakundeak iradoki du “kuadrilletako batek” asmoa duela txupinazoan Julen Ibarrola eta Alfredo Remirez preso politiko amurrioarren aldeko ekintza bat egiteko, 2005. urtean dipertsioa salatzeko eginiko ekimenaren formatua errepikatuz. Urte hartan Herriarenak koadrilak bi preso izendatu zituen ordezkari gisa, eta kartoizko panpinak erabili zituzten eurak irudikatzeko. Alfredo Remirez ekimen horretan parte hartzeagatik dago kartzelan, Twitter bidez bere iritzia plazaratzeagatik beranduago ezarri zioten zigorra berrerortze gisa interpretatu zuelako Entzutegi Nazionalak. Hori dela eta, “egoera hori saihestu” nahi du udalak aurten, “edozein gorabeheratik urrun egongo diren eta soilik denen gozamenerako pentsatuta egongo diren jaien aldeko deia eginez”.
“Gure eskuetan dauden neurri guztiak jarriko ditugu gertakari haiek errepikatu ez daitezen, txupinazoaren unean udaletxean egiten den ezerk salaketa eragitea saihestuz, udal langileek euren buruak epai bidezko prozesuan sartuta ikusteko arriskurik izan ez dezaten”, adierazi du Josune Irabien alkateak.
Herriarenak taldearen erantzuna
Herriarenak kuadrillak beste ohar baten bidez erantzun dio udalari. Jai-talde horretako kideek nabarmendu dute udal-gobernuaren jokaera ”larria eta arduragabea” dela, ”kaleratu duen prentsa-oharrak, planteatzen dituen helburuak hurbildu beharrean, hau da, jai lasaiak eta istilurik gabekoak izatea, tentsioa areagotu eta foko mediatikoa Amurrioko jaietako txupinazoan jarri besterik ez du egiten”.
Gauzak hala, alkateari eta bere talde politikoari leporatu diote Herriarenak kuadrilla ”berriro ere jomugan” jarri izana, eta azpimarratu dute txupinazoan ez dutela “inolako panpinik” ateratzeko asmorik. “Josune Irabienek txupinazoan eta Amurrioko jaietan berriro polizia eta justizia tartean sartzea nahi baldin badu eta, honela, gizarte osoak gainditutzat ematen zuen garaira bueltatu, gurekin ez dezala kontatu, gurekin jai dauka”.