Aurtengo Euskadi Literatura Sarien lehen hiru saridunak jakinarazi ditu Eusko Jaurlaritzak gaur. Yolanda Mosquera marrazkigile amurrioarrak Literatura Lanaren Ilustrazioaren saria jaso du, Guy de Maupassanten La pequeña Roque liburu ilustratuari esker.
Eider Rodriguez idazleak Euskarazko Literaturaren Saria jaso du Bihotz handiegia lanagatik eta Santos Zunzunegik, aldiz, gazteleraz idatzitako saiakerarena, Bajo el Signo de la Melancolía saiakeragatik.
Hiru irabazleak pozik agertu dira jasotako aitortzagatik. Mosquerak marrazkiak testuarekin uztartzeko izan duen abilezia azpimarratu du epaimahaiak. “Ilustrazioaren tratamendua eta dotorezia nabarmentzen dira, istorioaren gogortasunaren beste muturrean”, azaldu dute Eusko Jaurlaritzako ordezkariek, “era horretan, narrazioko intriga uneoro mantentzen duen irudi-testu irakurketa bikoitza eta giroa sortzen du”.
Horren ondorioz saritu dute amurrioarra, “narrazio gaitasunagatik, obra barruan bere unibertsoa asmatzeko duen sormenagatik eta ilustrazioen kalitateagatik”.
Oraindik lau irabazle jakinarazi behar dituzte: Gaztelaniazko Literaturarena, Euskarazko Saiakerarena, Euskarazko Literatura Itzulpenarena eta Euskarazko Haur eta Gazte Literaturarena. Hemendik bi astera emango dituzte aditzera. Sariak azaroaren 27an banatuko dira Gasteizko Artium Museoan.
Hainbat sari
Ibilbide oparoa egin du Mosquerak ilustratzaile gisa. 2011n irabazi zuen Peru Abarka album ilustratuen lehiaketa, eta munduko hainbat erakusketetan plazaratu zituzten bere irudiak, Mexikon, Italian eta Arabiar Emirerrietan, besteak beste.
Azken herrialde horretan ohorezko aipamena jaso zuen bi urte beranduago, Caballitos de sal haur poema-bildumako irudiak sortu ostean.
