Amurrioko Udalak gazteei zuzendutako “Euskaraldiaren I. bideo laburren txapelketa” jarri du martxan.
Bi kategoria egongo dira txapelketan, 12-17 urte bitartekoena eta 18-30 urte bitartekoena. Abentura parke baterako 4 pertsonentzako sarrera irabaziko dute lehenengo kategorian irabazleek. Nagusien kategoriako lan sarituen egileek, aldiz, 4 lagunentzako landetxe batean gaua pasatzeko aukera izango dute.
Azaroaren 19an abiatu zen txapelketa eta abenduaren 1a arte egongo da lanak aurkezteko tartea. Sari banaketa abenduaren 3an egingo da Amurrioko Juan de Urrutia Plazan, 18:30ean.
Oinarriak
Euskara gai bezala hartuta, ikus-entzunezko euskarrian aurkeztutako edozein adierazpen artistiko onartua izango da (flashmob, dantzak, filma laburrak, animazioak…). Lanak originalak eta inon saritu gabeak izan behar dute eta minutu bat eta 4 minutu arteko iraupena beharko dute izan.
Epaimahai batek baloratuko ditu lanak eta gaiarekiko lotura eta koherentzia izango dira gehien baloratuko diren alderdiak. Umorea, sormena eta kalitatea ere aintzat hartuko dira.
Bi bide daude lanak entregatzeko: 688 736 956 telefonora whatsapp bidez bidalita edo emailez euskaraldia.bideotxapelketa@gmail.com helbidera bidalita. Lanak bidaltzerakoan bideo laburren izenburua, egilearen izen-abizenak, adina eta kontakturako telefono bat eman beharko dira.