Orain Amurriok oharra plazaratu du EAJren udal gobernuak Ondasun Higiezinen Gaineko Zerga (OHZ) nola kudeatzen ari den salatzeko.
Oposizioko taldeak adierazi du 2017ko urtarrilean proposamena aurkeztu zutela zergaren hobariak moldatzeko, diru-sarrera gutxiago dituzten herritarren alde. Era berean, etxebizitza hutsei errekargua ezartzea proposatzen zuen talde politikoak, alokairuaren merkatua sustatzeari begira.
Orain Amurrioko kideen aburuz, hainbat batzordetan eskatu zuten gaia lantzea. “Itxaroteko eskatu ziguten orduan, laster ordenantza guztia moldatzeko eztabaida gauzatuko zela argudiatuta”. Baina eztabaida hori sei hilabetez atzeratu egin zen, oposizioko taldeak salatu duenez. “Horrek bultzatu gintuen irailean gaiari buruzko mozioa aurkeztera, udal gobernuak proposamen zirriborroa helaraztea eskatzeko”.
“Bi hilabete igaro dira ordutik hona eta iragan batzorde deialdian gobernu taldeak ez du proposamenik txertatu. Gai-ordenatik kanpo soilik aipatu zuten gaia, aldaketak nola aplikatu jakiteko erreferentziarik ez zutela esateko”. Horren aurrean, Orain Amurriok lau aukera plazaratu zituen. “Erreferentzia asko daude, baina ez dago borondate politikorik”.
Udal-gobernuaren erantzuna
Udal-gobernuak, bere aldetik, aipatu du ez duela proposamen itxirik aurkeztu “taldeen arteko adostasuna” bilatzen dutelako.
Era berean, batzordean gaiaz eztabaidatu zela nabarmendu du Txerra Molinuevok. Zinegotziak aipatu du OHZa ez dela 2012tik igotzen, “eta 2014an zabaldu zen hobariak jasotzeko baremoa”.