Abenduaren 24an, azken urteetan bezala, Babiora igoera antolatu dute Amurrio Trail eta Montes Solidarios taldeetako kideek. Aniztasun funtzionala duten lagunak mendi tontorrera heltzen laguntzea da ekimenaren funtsa.
Horrez gain, Amurrio Trail Taldeak beste elkartasun ekimen bat jarriko du abian abenduaren 23an. “16 ordu Babio non-stop” deitu dute eta arratsaldeko seietatik aurrera jendea Babio mendira etengabe igotzen egotea izango da helburua.
Horretarako, 18:00etatik aurrera, pertsona bat edo talde bat abiatuko da Amurrioko Juan de Urrutia plazatik, azken igoera abenduaren 24ean 10:00etan abiatuko den martxa jendetsua izanik. Gauzak hala, 15 orduz arituko da jendea txandaka igotzen.
Bildutako dirua AEFATi emango diote. Fundazio horrek ataxia telangiektasia duten pertsonekin lan egiten du. Gaixotasun hori du, hain zuzen ere, Hodei amurrioar gaztea. Abenduaren 24ko ekimenean parte hartuko du berak.
Izen emateak 10 euroko kostua izango du eta hemen klikatuta bete daiteke inskripzio orria. Antolakuntzatik jakinarazi dute dagoeneko badirela 30 pertsona ekimenean aritzeko prest baina deia zabaldu diote amurrioar orori bertan parte hartu dezan: “Orain arte 30 pertsonek eman dute izena erronka honetan, gustatuko litzaiguke gehiagok parte hartzea. Ez du axola egunez edo gauez animatzen diren parte hartzera, nahi duguna elkartasuna da”.
