aiaraldea.eus

"Galderren espetxeratzea ez da kasualitatea izan, herriarekiko konpromisoagatik kolpatzen jarraitzen dute"

Erabiltzailearen aurpegia Izar Mendiguren Cosgaya   Politika  Amurrio
"Galderren espetxeratzea ez da kasualitatea izan, herriarekiko konpromisoagatik kolpatzen jarraitzen dute"

Ehunka lagunek salatu dute Galder Barbado Bonillaren espetxeratzea. Soto del Realeko kartzelara bidali du Espainiako Entzutegi Nazionalak Aitor Zelaia gasteiztarrarekin batera. 

Galder Barbado Bonilla eta Aitor Zelaiaren kartzelaratzea salatzeko manifestazioa egin dute iluntzean Amurrion, Sortuk deituta. Mobilizazioaren amaieran adierazi dutenez, Soto del Realeko espetxean daude bi gazteak. "Abokatuek eurekin egoteko aukera izan dute eta ondo eta lasai daudela esan diete", aipatu dute gazte amurrioarraren gertukoek. 

Ekitaldian Amurrio jomugatzat dutela salatu dute: "Urtarrila hasieran Amurrioko familia abertzale baten etxearen kontra ustez tiro egin zuen polizia ohia kargurik gabe kalean dabilen bitartean, argudio ezin ahul eta lausoagoak erabiliz atxilotu ditu Ertzaintzak Galder eta Aitor. Polizia ohiak Amurrioko epaitegian deklaratu zuen bitartean, bi gazteak salbuespeneko Auzitegi Nazionalera eraman dituzte".

Mobilizazioan azpimarratu dutenez, "Galderren espetxeratzea ez da kasualitatea izan, bere herriarekiko duen konpromisoagatik kolpatzen jarraitzen dute". 15 urte zituenetik poliziaren jazarpena pairatu du Amurrioko gazteak. Sortuko kideen ustetan, oraindik "iraganari eta gatazkari" lotuta jarraitzea nahi duten aktore politiko garrantzitsuak daude, "testuinguru soziopolitiko berrira egokitzeko batere interesik ez dutenak. Herri honek eraiki nahi duen bake eta bizikidetzaren aurkako norabidean doaz espetxeratze hauek. Ekintza hauekin kikilduko gaituztela uste badute, ez dute lortuko". Zentzu horretan, onartezintzat jo dute egoerari bizkar ematea, "lotsagarria eta gaitzesgarria" dela iritzita.   

Bihar herrialdeko manifestazioa deitu du Arabako Sortuk Gasteizen, 18:30ean Correos plazatik abiatuta. 

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa