Onartutako udal aurrekontuak “kontinuistak eta austeritatearen aldekoak” direla salatu du Orain Amurriok

Orain Amurrioko zinegotziak, artxibo irudi batean. / Orain Amurrio

Opozisioko taldeak azpimarratu du aurrekontuak EAJren aldeko botoekin soilik atera zirela aurrera. EH Bilduren jarrera ere kritikatu dute.

Iragan astean onartutako udal aurrekontuen inguruan prentsa oharra plazaratu du Orain Amurriok. Oposizioko talde politikoak salatu du aurrekontu horiek  “kontinuistak eta austeritatearen aldekoak” direla, ez diotelako, besteak beste, “lanaren gaiari behar den bezala heltzen ezta prekarietatearenari ere”. “Zerbitzu publikoak pribatizatzen” dituela ere kritikatu dute. Era berean, “eskastzat” hartu dituzte berdintasun eta euskara teknikariak izateko egingo diren jardun erdiko kontratatzioak.

Inbertsioei dagokionez, Orain Amurrioko ordezkariek nabarmendu dute ados daudela aurrekontuetan planteatzen diren inbertsioetako askorekin, baina ez daude futbol zelai berria eraikitzearen alde. “Inbertsio eza nabaria da bai lan talde zein tresneriaren egokitzapenean eta bai udal biltegian, horrek ekar ditzakeen lan arriskuekin. Ez dira laguntza sozialerako neurri berriak hartzen eta ez da hutsik dauden etxeen politikan esku hartzen”.

EAJren botoekin soilik
Horrez gain, opozisioko taldeak azpimarratu du aurrekontuak EAJren aldeko botoekin soilik atera zirela aurrera. “PSOE, legealdi guztian zehar aurrekontuak babestu dituena, abstenitu egin zen, berak aurkeztutako emendakin guztiak oposizioak atzera bota zizkiolako”, azaldu dute. EH Bilduren jarrera ere kritikatu dute, , koalizioa abstenitu egin baitzen bozketan -nahiz eta hasieran osoko emendakina aurkeztu-, EAJrekin akordio bat erdietsi zuelako.

Orain Amurrioren arabera, aurrekontuetan egondako aldaketek ez dute EH Bilduren abstentzioa justifikatzeko balio. Gauzak hala, talde independenteko kideek gogorarazi dute ez dutela “pertsonak ardatz ez dituen”, udal zerbitzuen “pribatizazioa bermatzen duen” eta “austeritatearen ildotik doan” aurrekonturik babestuko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide