aiaraldea.eus

Urte amaieran hasiko dute gasolindegi zaharra ordezkatuko duen biribilgunea

Erabiltzailearen aurpegia Izar Mendiguren Cosgaya   Jendartea  Amurrio

Gasolindegi ohia urbanizatzeko kontratazio prozesua hasi du udalak. Biribilguneaz gain, bidegorria eraikiko dute bertan.

Urte amaieran hasiko dute gasolindegi zaharra ordezkatuko duen biribilgunea
Abenduan hasiko dira obrak, udalaren aurreikuspenen arabera. / Aiaraldea.eus | Ikusi handiago | Argazki originala

575.777 euroko inbertsioa aurreikusi du Amurrioko Udalak herriguneko gasolindegi ohia urbanizatzeko. Prentsa oharrean aurreratu dutenez, urtearen amaieran hasiko dituzte lanak. "Une honetan gasolindegi bat dago bertan. Lanei esker, inguru horretako trafikoa berrantolatu ahal izango da", adierazi du tokiko erakundeak. Hala, Aldai, Etxegoien eta Jose Medinabeitia kaleek biribilgunean egingo dute topo. "Berrurbanizatzeko lanek inguruko trafikoa berrantolatzeko aukera emango dute. Biribilgunearen erakuntzaz aparte, saneamendua eta argien zaharberritzea proiektatu dira, baita bidegorria eraikitzea ere".

Obrak hasi berritan eraitsiko dute erdiguneko gasolindegi ohia, "eta lurreko kutsadura garbituko da". Modu horretan, espaloiko tarte batzuen altuera handituko dute, besteak beste. Horrez gain, argiteria eta ur zikinen zein saneamendurako kolektoreak berriztatuko dituzte. Eta, bide batez, Aldai-Elexondo kaleetako bidegorriari segida emango diote. 

2014an iraungi zen gasolindegi ohia erabiltzeko baimena. Iaz, aldiz, zoruko kutsadura garbitzeko lan-hitzarmena adostu zuten eraikineko jabeak eta udalak. Ondorengoa da proiektuaren planoa:

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa