Aldaketa klimatikoa eta Kataluniako egoera izan dituzte hizpide Amurrioko Udal Osoko Bilkuran

Amurrioko Udal Osoko Bilkura, artxibo irudi batean. / Aiaraldea.eus

Opozisioko zinegotzi bat liberatzea eta herritarrei Nafarroako uholdeetan laguntzeko “auzolan ekonomikoan” parte hartzera deitzea ere onartu zen plenoan, besteak beste.

Atzo egin zen Amurrioko urriko Udal Osoko Bilkura. Hainbat gai landu ziren bertan, eta adostasuna izan zen nagusi. Trakzio mekanikoko ibilgailuen gaineko tasa arautzen duen ordenantza izan zen onartu zen lehen puntua. Talde guztiek bozkatu zuten alde.

Oposizioko zinegotzi bat liberatzea onartu zen jarraian, kasu honetan ere aho batez. EH Bilduko Irune Iturbe Errasti izango da liberatua.

Nafarroako uholdeak
Tafalla inguruan jazotako uholdeen inguruko adierazpena ere landu zuten plenoan, EH Bilduk proposatuta. Kasu honetan ere erabatekoa izan zen adostasuna. Hau da erabaki zena: udalak uholdeek kaltetutako herriekiko elkartasuna adieraztea eta “auzolan ekonomikoan” parte hartzeko deia luzatzea herritarrei.

Aldaketa klimatikoa
Aldaketa klimatikoari buruzko testua ere landu zuten. EH Bilduk plazaratu zuen ideia, eta PSE-EEk hainbat ideia gehituta plazaratu zuten plenoan. Kasu horretan ere aho batez onartu zen, adierazpen instituzional gisa. Hala ere, talde bakoitzak bere argudio propioak plazaratu zituen. EH Bilduk nabarmendu zuen udaletik oraindik lan handia egiteke dagoela. Antzeko ildotik joan ziren Orain Amurrioren argudioak. “Orain arte egin dena ez da nahikoa izan, larrialdi bat dela ulertzen badugu premiazko neurriak hartu beharko dira arazoari aurre egiteko”, adierazi zuen Kepa Gonzalez zinegotziak.

EAJk, bere aldetik, orain arte herrian egin diren ekimenak balioan jarri eta egoerari buelta emateko herritarren inplikazioa beharrezkoa dela nabarmendu zuen. “Hemen bizi garenok kotxea aparkatuta uztea lortzen badugu planeta salbatzen lagunduko dugu”, azpimarratu zuen Josune Irabien alkateak.

Mozioa onartuta, hainbat etxerako lan izango ditu udalak: zortzi hilabeteren buruan herriko eraikin publikoen diagnostiko bat egin beharko du, jasangarritasun energetikoa bermatzen den edo ez ikusteko.

Kataluniako egoera
EH Bildurena izan zen baita plenoan landu zen azken mozioa. Kataluniako herritarrei eta kartzelan dauden politikariei elkartasuna adieraztea izan zen testuaren xedea. Kasu honetan PSE-EEk ez beste talde guztiek bozkatu zuten proposamenaren alde. Alderdi sozialistak emendakina aurkeztu zuen, baina ez zen aurrera atera, gainontzeko taldeek aurka bozkatu zutelako.

Azaroaren 25aren harira
Beste gai bat ere lantzea proposatu zuen EH Bilduk: Emakumeen aurkako Indarkeria desagerrarazteko Nazioarteko Egunerako adierazpen instituzionala. “Hurrengo plenoa azaroaren 25a pasata izango denez uste dugu orain dela unea gaia lantzeko”, azaldu zuen Garazi Dorronsoro zinegotziak. EAJk eta PSE-EEk, baina, gaia lantzearen aurka bozkatu zuten. Josune Irabienek azaldu zuen badaudela gaia lantzeko foro egokiagoak, “datatik hurbilago egongo direnak”.

Urtegiko algak
Erregu eta galderen atalean EH Bildu izan zen parte hartu zuen talde bakarra. Iñaki Ibarluzea zinegotziak Maroñoko urtegian agertutako algen inguruan galdetu zuen, eta adierazi zuen faltan bota zuela informazioa osatuagoa Ur Patzuergoaren partetik.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide