Amurrioko Udalak bertan behera utzi ditu, denbora baterako, berak kudeatutako hainbat instalaziotan programatutako ekintza guztiak, koronabirusak udalerrian izan dezakeen balizko hedapenari aurre egiteko. Gaur bertan jarriko dute neurria indarrean. Era berean, gaur arratsaldean San Roken eta astelehenean Alkinarren aurreikusitako auzoetako batzarrak ere atzeratu dira, ohar batean informatu dutenez.
Honako toki hauek itxiko dituzte: “Kultur Etxea (arte eskola, trikitixa eskola eta ballet eskola), liburutegia, La Casonako erakusketa aretoa eta turismo bulegoa, Amurrio Antzokia, Musika Eskola, Nagusi Etxea (ostalaritza jarduera irekita egongo da), Amurrio Bidean, Bañueta kiroldegia eta udal kirol instalazio guztiak”.
Dena den, Herritarren Arretarako Zerbitzua irekita mantenduko duela adierazi dute udaletik, posible diren kontsultak telefonoz egitea gomendatuta, 945 89 11 61 zenbakira deituta. Herritar guztiak informatuta mantenduko dituztela ere esan dute, udalaren kanal ofizialak, sare sozialak eta Amurrio.eus webgunea baliatuta.