aiaraldea.eus

[IRITZIA] Hegal egiten

Erabiltzailearen aurpegia Erredakzioa   Jendartea  Amurrio

Garikoitz Ibarrola Etxebarria gogoan izateko iritzi artikulua plazaratu dute euren lehengusin eta lehengusuek. Atzo zendu zen 38 urteko amurrioarra, eta larrialdi egoera medio 21:00etan etxeetako balkoietatik txaloka helarazi zieten familia eta lagunei babesa herritarrek.

[IRITZIA] Hegal egiten
Garikoitz Ibarrola Etxebarria. / I.E Familia | Ikusi handiago | Argazki originala

“Hauxe da egun motela” zion Itoiz  taldearen “espaloian” diskoaren  lehenengo kantak. Eta horrelakoa da gaurko eguna ere, motela.

Astebururo igotzen ginen zuen Opel Corsa txurian, Euskal Herriko mendi eta haranetatik ibilaldiak egiten joateko. Txarli zen gidari eta bere ondoan beti ere, Rosa, bere tortila goxoak prest, ume bihurri haien gosea asetzeko. Atzeko partean eserita, Iker eta zu, gurekin elkartzeko irrikitan. Behin eta berriro entzuten genuen kotxearen radio cassette zahar hartan “espaloian” diska…

Bizitza bat konpartitu dugu zurekin. Txikitako urtebetetzeetako merendolak, jaunartzeak, kalean egindako trastadak, parkeko orduak… Zurekin beltztu ditugu eskuak frontoian, eta zurekin hautsi ditugu hezurrak futbolean, bizikletan… Zurekin mozkortu gara taberna eta txosnetan, zurekin kantatu dugu eta zurekin egin dugu topa ezkontzetan. Zurekin egin dugu garraxi kaleetan eta zurekin jarri gara pankarta baten atzean. Zurekin egin dugu barre eta zurekin egin dugu negar.

Guk ezin izango dugu zure konpainiaz  gehiago  gozatu, eta Ametsek eta Manexek ezin izango dute osaba Garirekin berriro jolastu, goizegi joan zara…

Bazen bereziki gustoko genuen kanta bat Itoiz-en diska hartan, bigarrena, “hegal egiten”. Letrak horrela zion : "orain herritik mutil bat falta da, ez dago inor bere etxeko leihoan, baso ilunetan dabil hegaletan, txantxangorria bezala…”.

Tristurak eta nostalgiak itotzen gaituen bakoitzean, Lezamara joango gara eta Gurbistatik gora, Txibiarteko puntara igoko gara. Seguruenik inguru haietan entzungo dugula berriro ere gure txantxangorria. Rosa, Txarli, Iker, Anaisa, Amets eta Manex, zuen ondoan egon gara, gaude eta egongo gara beti!


Zure lehengusu-lehengusinak:

Maripaz, Aritz, Erlaitz, Juan Felix, Nagore, Arkaitz, Elias, Libe Ane, Elene, Gartzen, Noemi, José Ángel, Nora, Adei, Mónica, Egoitz, Alaia, Oier, Joseba, Ana, Aimar, Ander, Unai, Gentzane, Bernardo, Aimar, Sara, Amaia, Ion, Iune, Ane, Joseba, Leticia, Daniela, Arian, Haizea, Endika, Gaizka, Ane, Naiara, Xavi, Ane, Mikel, Iñaki, Ainara, Julian, Jonathan, Maitane, Oscar, Julen, Nerea eta Iratxe.

Erantzunak

Erabiltzailearen aurpegia Aitite Erantzuna | #1

Joan zara Gari. Hori esan zidaten atzo, Rolin hil da. Eta eskertzen dut isolamenduko egun hauetan, esan zidan horri besarkatu ahal izatea jarraian. Sinistu gabe nago oraindik, nahiz eta atzo gauean Amurrioko lehioetatik isiltasun pandemikoa apurtzen eskeini genizun omenalditxoak aspaldian sentitu gabeko emozioen lurrikara sortu nire barnean. Ostia! Joan zara Gari, baina ez litzaidake arraroa egingo egoera aldrebes hau amaitutakoan tabernara joan eta zu ikustea kafe, trago edo pintxo bat hartzen. Baina ez da izango. Askotan errepikatu beharko diot hori nire buruari.
Idatzizko besarkadak familia eta lagunentzat, noizbait fisikoki emateko zain geratzen direnak.
Eta aupa Gari, kaguendiox!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa