Kaskagorri eta Etorkizuna klubek uztailaren erdialdera arte luzatuko dute epea taldeetan izena emateko. Hemen, hain zuzen, eman daiteke izena. Taldeek azaldu dute 2019/2020 denboraldian izena eman zutenei ez dietela kobratuko 2020/2021eko inskripzioa, koronabirusak lehiaketen etena ekarri baitzuen.
Horrez gain, Etorkizunak nabarmendu du nesken taldea osatu nahi duela. Horretarako zenbait emakumezkok begirale ardurak hartu dituzte euren gain.
Amurrio Clubaren filiala berriro
Ekainaren 27an Amurrio Clubeko batzarrak Kaskagorri berriro bere filiala izatea onartu zuen. 2017an Kaskagorrik uko egin zion horri, Amurrio Alavesekin hitzarmena negoziatzen ari zen bitartean. Izan ere, Kaskagorrik Athletic Clubarekin mantendu nahi zuen akordioa. Orain, filialak elkarlan baldintzak adostu nahi ditu bere independentzia bermatzeko, klubeko kide batek adierazi duenez.
Bestalde, Amurrio Clubak presidentetza eta zuzendaritza mantenduko ditu. Asteburu honetan agortzen zen epea hautagaitza berriak aurkezteko, eta bakarrik Miguel Angel Jauregirenak egin du aurrera. Ondorioz, 2016an hartutako ardurak berritu ditu Jauregik.
