30-12 irabazi zuten Arabako herrien arteko pala txapelketa Ane Murga eta Ane Aldama amurrioarrek. Uztailaren 31n izan zen finala Aretan. "Finalaren emaitzarekin oso pozik gaude, herrien arteko irabazle izateak pozten zaitu, azken finean", dio Ane Aldamak.
Partidari dagokionez, ez zitzaien gogorra egin, "eguzkiak gehiegi jotzen zuen arren".
Koronabirusa dela eta, pala txapelketak eragina nabaritu du, Aldamak aitortu duenez. "Uztailean hasi zen txapelketa pandemiaren eraginez, eta horregatik, herri askok ez dute parte hartu".
Ondorioz, 3 norgehiagoka gainditu behar izan dituzte bakarrik: "Hala ere, oso gustura egon gara Ane eta biok txapelketa osoan". Txapelketa irabazita, Gipuzkoa eta Bizkaiko herri txapeldunekin lehiatzea izango dute hurrengo erronka. Horrez gain, uda garaiko partidetara bideratu dituzte indarrak.
Kirolaren egoerari buruz galdetuta, emakumeak animatzeko mezua zabaldu du bikoteak: "Frontoia ere emakumez betetzea nahiko genuke, bai palan zein esku pilotan. Pala, erraz eta gure inguruko edozein herritan jokatu daitekeen kirola da; eta, gainera, hainbat herritako gazteak ezagutzeko aukera ematen du. Modu honetan, Aiaraldeko neska gazte guztiak animatzen ditugu gurekin batera frontoian palaz gozatzera".