Egoera sanitarioa dela eta aurten ez dira antolatuko abenduaren 31n ohikoak diren San Silvestre herri lasterketak. Horregatik, Amurrioko Oinkariak atletismo taldeak erronka birtuala luzatu die herriko korrikalariei.
STRAVA aplikazioa erabilita, 10 kilometroko ibilbidea osatu dute. Nahi duen orok urtarrilaren 6ko 20:00etara arte izango du aukera ibilbidea osatu eta lortutako marka aplikaziora igotzeko. Urtarrilaren 7an iragarriko dituzte ibilbidea denbora laburrenean osatu duten kirolarien izenak.
Zirkuitua Refor enpresaldetik abiatzen da, errugbi zelai berriaren ondotik, eta Alemanen ikastetxe zaharreraino iristen da, bertan buelta eman eta itzulera bidea osatzeko. Oinkariak taldeko kideek jakinarazi dute ibilbidea aplikazioan markatuta dagoen bezala jarraitu behar dela, STRAVA aplikazioak kontutan har dezan.
“2020. urtea korrikalarioi gehien gustatzen zaigun moduan agurtzeko modua” dela azaldu dute, "gure onena ematen”.
San Silvestre solidarioa Orozkon
Orozkon ere ezingo dute urteroko San Silvestre Duatloia ohiko moduan antolatu, eta ekimen solidarioa jarri dute abian.
Elikagai bankurako dirua bilduko dute aurtengo edizio berezian. Internet bidez ari dira dohaintzak jasotzen; euro batekoa umeen kasuan eta 3 eurokoa helduenean.