Urtarrilaren 21 eta 22an epaituko dituzte, Madrilgo Entzutegi Nazionalean, Galder Barbado amurrioarra eta Aitor Zelaia gasteiztarra. Fiskaltzak 8 urteko espetxe zigorra eta 7 urteko baldintzapeko askatasuna eskatu du bi gazteentzat. Testuinguru honetan ANkerkeriari STOP! dinamika aurkeztu dute gaur, bi auzipetuen aldeko elkartasun dinamika bat abian jartzeko.
"Aitor Zelaia eta Galder Barbadoren aurkako auzia beste oztopo bat gehiago da, baketik urruntzen gaituena eta iraganeko amesgaiztoak gogora dakarzkiguna" azaldu dute dinamikaren sustatzaileek Gasteizen egindako agerraldian.
Bi gazteen aurka zabaldutako auzibidea ""lekuz kanpo dagoen kafkiar prozesutzat" jo dute. "Herri honek justizia eskatzen du, elkarri eragindako zauriak sendatzen lagunduko duen justizia, bizikidetza sustatuko duen justizia" aldarrikatu dute.
Atxikimendu kanpaina
Osatu duten manifestuaren aldeko atxikimendu bilketa abiatu dute, ANkerkeriariSTOP.eus webgunean. Atari horretan bertan dinamika bultzatzeko baliabide desberdinak egongo dira ere eskuragarri: Whatssap profileko argazkia aldatzeko irudia, edota sare sozialetan atxikimendu argazkiak elkarbanatzeko kartel ereduak, besteak beste.
Asanblada informatiboak eta mobilizazioak
Amurrion, urtarrilaren 11n dute jarrita elkartasun dinamikaren baitako lehenengo hitzordua: asanblada informatiboa egingo dute auziaren eta elkartasun dinamikaren nondik norakoak azaltzeko.
Urtarrilaren 16an, dinamikaren mugarri nagusia izango den herrialde mailako manifestazioa egingo dute Gasteizen; arratsaldeko 17:30ean Andra Mari Zuriaren plazatik hasita. Epaiketaren egunetan -urtarrilak 21, 22- mobilizazioak antolatuko dituzte Amurrion eta Gasteizen.
