Amurriok 2.912.567,77 euroko inbertsioa jasoko du Arabako Foru Aldundiaren Obra eta Zerbitzuen planari esker. Laguntza ekonomiko hori herriko entitaten artean banatuko da hainbat proiektu egikaritzeko.
Udalak 864.477 euroko laguntza jasoko du, herrigunean bi proiektu aurrera ateratzeko: merkatu zaharreko zentro soziokulturala eta Landazuri Etxeko eguneko arretarako zentroa.
Merkatu zaharra
Aldundiaren planaren bitartez, 288.159,04 euroko diru-laguntza jasoko du udalak 894.770,58 euroko kostua izango duen proiektua gauzatzeko. Foru kaleko 9. zenbakian dagoen merkatu zaharra birgaitu eta zentro soziokultural bat atonduko dute bertan.
Erabilera anitzeko espazioa izango da, azokak, erakusketak, kontzertuak edota bestelako ekintzak egiteko azpiegitura eskainiko duena.
Azpiegitura 1976. urtean eraiki zen merkatu bezala erabiltzeko helburuarekin baina urteak daramatza inolako erabilerarik gabe.
Landazuri Etxea
Obra eta Zerbitzuen Foru planak Landazuri Etxean eguneko arretarako landa zentro bat egikaritzea du helburu ere. Horretarako, 1.067.620,30 euroko aurrekontua osatu du udalak eta Foru Aldundiak 576.318,08 euroko diru-laguntza bideratuko du.
Merkatu Zaharrak bezala, mendiko kaleko 19. zenbakian kokatutako Landazuri Etxeak 20 urte baino gehiago eman ditu inolako erabilerarik gabe. Etxearen jabeek dohaintzan eman zioten udalari bertan pertsona nagusientzako espazio bat egiteko helburuarekin. Amurrioko Gazte Asanbladak 2012an okupatu zuen eraikina, hau gaztetxe bihurtzeko asmoz, baina berehala desalojatu zuten.
Obrak 5 batzar administratiboetan
Obra eta Zerbitzuen Foru Planaren baitako gainerako diru partidak Baranbio, Larrinbe, Lekamaña, Lezama eta Tertangako batzar administratiboetara bideratuko dira.
Baranbion ur-hornidurako sarea berrituko dute, eta Larrinben elizako plazaren urbanizazioa gauzatzeko aurreproiektua jarriko dute abian.
Lekamañan eta Tertangan saneamendu sareko konexioak hobetu, hauek handitu eta Urduñako ur-fekalen araztegiekin lotzeko baliatuko dute diru-laguntza.
Azkenik, Lezaman, horniketa eta saneamendu sareak berrituko dituzte ere, Larrakon eta Latatun kokatutako araztegietan berrikuntzak egitearekin batera.