Amurrioko Udalak eskatu dio Arabako Foru Aldundiari Aiara Etorbideko 7. eta 9. zenbakietako higiezinaren lagapena, bertan Emakumeen Etxea proiektua garatzeko. EH Bildu udal taldeak aukeratutako kokapena errefusatu du, eta gaineratu du "iritzi teknikoak, politikoak eta, batez ere, interes sozialak barnebiltzen ez dituen proiektua" ez duela babestuko.
Parte hartzerako prozesua
Koalizio abertzaleak gogorarazi du EAJk urte hasieran parte-hartzerako prozesua abiatu zuela proiektuaren definizioa gauzatzeko. Horretarako enpresa bat kontratatu zuen udalak eta kargu politikoekin eta teknikariekin lau bilera egitea adostu zen.
Lehenengo bilera martxoaren 24an egin zela azaldu du EH Bilduk: zenbait esperientzia ezagutu zituzten, eta erabakirik hartu gabe hurrengo bilera apirilaren 14rako jarri zuten. Udalak, ordea, Emakumeen Etxearen kokapena martxoaren 30ean erabaki zuela salatu du udal-taldeak.
"Errutina bihurtu da gobernu taldeak ematen dituen pausoen berri eskualdeko komunikabideen bidez izatea" azpimarratu du Iraide Ortiz San Vicente EH Bilduko kideak. Kokapenaren erabakia nork hartu duen galdegin diote udalari, bai eta Amurrioko Mugimendu Feminista kontuan hartu den proiektuaren gauzapenerako.
Behi-behineko erabakia
Txerra Molinuevo Amurrioko alkateak adierazi du hedabidetan erabakitzeke dagoela oraindik Emakumeen Etxearen kokapena. Elexondo kaleko lokalean ludoteka kokatzea zen udalaren hasierako asmoa baina Armurulanda plazara eramango dute.
Foru Aldundiari higiezina eskatu besterik ez dutela egin azaldu du, "parte-hartzerako prozesuan erabakiko da Emakumeen Etxea bertan gauzatuko den edo ez".
Mugimendu feministaren bilera
Hain zuzen ere, Emakumeen Etxearen inguruan hitz egiteko bilera deitu du Amurrioko Mugimendu Feministak, biharko -apirilak 20-, arratsaldeko 18:00etan Kultur Etxean. Udalak hartutako erabakia herritarrei eta Mugimendu Feministari bizkar emanda hartu izana kritikatu dute.