Espainiako Espetxe Erakundeetako Idazkaritza Nagusiak adierazi zuen ostiralean Iñaki Krutxaga espetxez aldatuko zuela. Berez, Almeriako kartzelatik Leongo presondegira eramango zutela zabaldu zuten.
Krutxaga oraindik sakabanatuta egongo da, Leon Euskal Herritik 300 kilometrora baitago, baina Almeriako espetxea 1.000 kilometrora baino gehiago dagoela aintzat hartuta, etxetik nabarmen hurbilago egongo da. Halaber, bigarren gradura pasako da Krutxaga.
Presoaren inguruko iturriek berretsi diote Aiaraldea Hedabideari Andaluzian jarraitzen duela. Gutxienez, ostiralera arte hor jarraituko duela uste dute.
Berarekin batera Alberto Viedma ere mugituko dute Almeriatik, Topasera, hain zuzen. Espetxe agintariek iragarri zuten Marixol Iparragirre ere behin-behinean Zaballan kokatuko dutela.
Galdakaokoa jatorriz, Belandian bizitakoa
Iñaki Krutxaga ez da aiaraldearra jatorriz, baina Amurrion hartu zuten bere babesaren ardura, neurri batean. Izan ere, Galdakaokoa izan arren, eskualdean bizi izan zen zenbait urtez, Belandian, alegia.
Krutxagaren etorkizuneko presondegi aldaketak hautsak harrotu ditu eskuin muturreko hedabide espainiarretan. Izan ere, 2002an 33 urteko kartzela zigorra ezarri zion Entzutegi Nazionalak Ernest Lluch ministro sozialista ohia hiltzeagatik.