Jokin Bildarratz Hezkuntza Sailburuaren aurrean protesta egingo du Zabaleko Bizirik! plataformak

Amurrion bi manifestazio egin dituzte jadanik. / Aiaraldea.eus

Zabaleko Bizirik! plataformak Gasteizera joko du bere aldarrikapenak Hezkuntza Sailburuaren aurrera eramateko. Izan ere, amurrioarrek salatu dute Jokin Bildarratzek birritan kale egin diela eurekin hitzordua zehaztu ostean.

Ekainaren 15ean, asteartean, Zabaleko Bizirik! plataformako kideek Gasteizera joko dute elkarretaratzea egiteko. Hain zuzen, mobilizazioa Guridi musika kontserbatoriaren aurrean izango da. Barruan egongo da Jokin Bildarratz Hezkuntza Sailburua, urtero Arabako Eskola Publikoaren zuzendariekin egiten duen ekitaldian.

Amurrioko plataformak bere kabuz deitu du mobilizazioa, baina ahalik eta eragile gehien erakarri nahi dituzte. Izan ere, protesta ez da izango soilik San Jose auzunean kokatuta dagoen eskolaren itxieraren kontra, baizik eta zerbitzu publikoen murrizketen aurka. "Jadanik hitz egin dugu sindikatuekin eta Gasteizko eragileekin ere harremanetan jartzen saiatuko gara", azaldu dute Zabaleko Bizirik! plataformako kideek.

Jokin Bildarratzek bi aldiz kale egin die

Plataformak erabaki du elkarretaratzea antolatzea Gasteizen Jokin Bildarratzek bi aldiz bakarrik utzi dituelako, eurekin hitzordua adostu eta gero: "Maiatzaren 26an Zabalekora etorri behar zen, baita asteazken honetan, baina azkenean ez da agertu ez egun batean ez bestean. Hezkuntza Sailak esan digu agenda arazoak izan direla, baina ez bagaitu entzun nahi, gu joango gara entzun gaitzan".

Maiatzaren amaieran sustatu zuten Zabaleko Bizirik! plataforma, San Jose auzoko ikastetxea ixteko asmoa dagoela salatzeko. Geroztik, hainbat mobilizazio egin dituzte, modu arrakastatsuan, gainera.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide