Ehunka lagun bildu dira gaur Amurrion iragan ostegunean egondako eraso homofoboa salatzeko. 17:30ean ehundik gora lagun batu dira parkean, Aiaraldeko Mugimendu Feministak eta Jai Herrikoien Aldeko Batzordeak deitutako agerraldian. “Azken aste eta hilabeteetan” LGTBfobia kasu ugari salatu direla nabarmendu dute bi eragileek. Horren aurrean, “autodefentsa transmaribibolloa” erabiltzeko unea dela aldarrikatu dute. “Gu defendatuko gaituena ez da polizia izango, gure lagunak, familia, militantzia kideak eta auzokideak izango dira”, adierazi dute.
Elkarretaratzea plazan
Ondoren, arratsaldeko seietan, ehunka lagun bildu dira Amurrioko Udaletxearen aurrean eginiko elkarretaratzean. Adierazpen bateratua irakurri dute bertan Amurrio eta Aiarako alkateek (Txerra Molinuevo eta Gentza Alamillo). Horrelako gorroto delituak giza eskubideen aurkakoak direla nabarmendu dute, eta jendartean tokirik ez dutela aldarrikatu dute.
Bihar, Aiaran
Gaurkoak ez dira izango eraso homofoboa salatzeko egingo diren ekimen bakarrak. Bihar -abuztuak 15- elkarretaratzea egingo dute 13:00etan Arepalditzako Ferialean, Aiarako Udalak deituta.
