Larunbatean Ertzaintzaren Brigada Mugikorra bertaratu zen Amurrioko Parkera, hainbat bizilagunen deiak jaso ostean. Ertzaintzak berak zabaldutako ohar batean azaldu zutenez, bertan bildutako gazteei musika kentzeko eskatu ostean, gazte talde bat polizia agenteak iraintzen eta kristalezko botilekin erasotzen hasi zen.
Agenteek 17 eta 18 urteko bi gazte identifikatu zituzten, eta maskara jarrita ez eramateagatik isundu zituzten. Gainera, adinez nagusiari desobedientzia delitua ere egotzi zioten, Ertzaintzaren arabera, identifikatzeari uko egin ziolako.
Pintaketak Amurrion
Gertaeren biharamunean Ertzaintzaren aurkako hainbat pintaketa azaldu ziren herrian, "Vacuna de la rabia para la zipaiada" edo "Zipaioak parketik, kanpora!" bezalako mezuekin. Amurrioko EAJk gogor gaitzetsi ditu pintaketa hauek.
"Une erabakigarrian gaude, eta beharrezkoa da ezarritako neurriak eta gomendioak betetzen direla bermatzen jarraitzea, COVID-19ren transmisioa geldiarazteko", azaldu dute Amurrioko jeltzaleek. Plazaratutako oharrean, EAJk ulergaitza deritzo "gutxiengo baten gizalegearen aurkako eta elkartasunik gabeko jarrerak kontrolatzen saiatzen diren pertsonak zalantzan jartzea."
Azkenik, pandemia osoan zehar Amurrioko herritarrek erakutsi duten jarrera arduratsua goraipatu nahi izan du EAJk oharrean.
Adierazpen gehiago
PSE-EEko kideek ere bat egin dute jeltzaleen salaketarekin, eta elkartasuna adierazi diete ertzaina guztiei. Ernai gazte antolakundeak, kontrara, EAJren jarrera salatu du, "indarkeria poliziala salatzen duten mezuak" ezabatzea egotzita.