Azaroaren 18an 19:00etan Mendiko Lagunak taldeak La montaña desnuda dokumentala proiektatuko du Amurrio Antzokian. Mendi Jardunaldien edizio berriaren barruan egingo du eta Aiaraldea Komunikabideak sarrera bikoitza zozketatuko du aurreko egunean. Hemen eman daiteke izena parte hartzeko.
Filmak mendizalearen bizipenak jasotzen ditu Nanga Parbatera egindako espedizioan. Izan ere, tontorra neguan zapaltzea lortu zuten lehen pertsonak izan ziren Alex Txikon eta bere kideak.
Edonola ere, pelikula horren ostean beste zazpi ekintza egingo dira. Takomano Espeleo taldeak hitzaldia eta txangoa eskainiko du azaroaren 19an eta 20an. Egun horretan Xabi Mujika mendizalea Aizkorriri buruz mintzatuko da eta hurrengo egunean, azaroaren 21ean, Izoriara joko dute, Babioko herri harresitua bisitatzeko.
Azaroaren 24an Kepa Lizarragak Baltoroko glaziarrari buruz hitz egingo du eta bi egun geroago Ana Zamorano 'Mundua bizikletan' solasaldian mintzatuko da. Egun horretan Gorobel Ibilaldiko argazki eta bideo lehiaketako sariak banatuko dituzte.
Azkenik, azaroaren 27an Pou anaiek idatzi duten liburua aurkeztuko dute: Aupa Pou: una vida encordados. Katekesi Aretoan izango dira ekintza gehienak.
