Pause

XABIER ZEBERIO, IÑAR SASTRE, AITOR ETXEBARRIA eta EÑAUT ZUBIZARRETA

“Intimista, pausatua eta barea, sakona eta era berean lebitatzailea, emozioen ertzak kilimatu eta leuntzen dituen lan biribila da Pause”. Horrelaxe definitzen du Harkaitz Canok Xabier Zeberiok egin duen lehen lan bakarka. “Atmosfera hori egiten da atrezzo soiletik eta gure arretaren erdigunean ipintzen da: lanbroz ehundutako animo egoera horiek inguratu eta gatibatu egiten gaituzte oharkabean, eta jada ez dugu giro horretatik irten nahi.”

Donostiako idazleak jarraitzen du: “trikimailurik gabeko zirrara. Aitor Etxebarriaren lemak behelainoz bildutako bibrazioa eman dio ontziari. Iñar Sastreren pianoak seinalatu eta askatu egin ditu kostaldeko paisajearen korapiloak.”

Eszenan lau musikari handi elkarrekin arituko dira. Xabi Zeberio proiektu honen lemazainak nyckelharpa, biola eta biolina eskuetan. Inar Sastre pianoan. Eñaut Zubizarreta Celloari ekingo dio eta bukatzeko Aitor Etxebarria, gaurko musika garaikidea maisua, teklatu diseinu sonoro eta elektronikaren gidaria izango da.  

Zozketa: Martxoak 19, 14:30

Antxine

Janire Etxabe

Dantza bertikalaren eremuan aritu da buru belarri 2017. urtetik aurrera. Antxine dugu azken sormena eta berriro ere ikuslea harritzeko eta hunkitzeko gogoarekin eszenaratuko du festibalean. Performance honek arte plastikoak eta dantza bertilaka uztartzen ditu.

Emakume bat burukoa jantzita eszenan dago. Haren bizi-zikloaren bidean duen karga emozionalari eta kulturalari erreparatzen dio. Sinbologiaz aldatzen joango da eta objetuek protagonismoa hartuko dute.

Emakumea bertan  jaioko da, babestuko da, eta bertatik isuriko ditu ahotsa, odola, izerdia eta bizia. Soinu-eremuan, ttun-ttuna edo xirula bezalako doinu tradizionalak soinu industrialekin uztarutuko dira.

Jose Pablo Arriagak sortu ditu objektuak eta Paula Olazek soinu-espazioa.

Emanaldiaren ondoren solasaldia izango dugu.

Zozketa: Martxoak 17, 14:30

Consonni bertso-saio espekulatiboak

Idoia Tapia eta Bloñ

ALTER NATION eta BAÑOLET KANTUZ

Gazte sormena gure kulturaren etorkizuna ari da iragartzen. Honetan bi sortzaile batu ditugu. Alde batetik Idoia Tapia eta berak sortu duen arte eszenikoko lehen performancea, Beste aldetik, Iparraldetik datorkigun Bloñ musika talde berritzailea.

Idoia Tapia Skabidean taldean ibili da ahotsa jartzen baina Dantzerti bukatu berri du eta arte eszenikoak ditu helburu. “Alter Nation” sormen berria plazaratuko du estrainekoz. Identitate Nahasmendu Disoziatiboaren inguruko konferentzia performatiboa da. Konferentzia honetan ezjakintasunetik psikopatologia honen funtzionamendua joko eszenikoeran bidez ulertzen saiatuko da.

Arte Dramatikoko Gradu Amaierako lanean hasi zen proiektu hau gartzen. Ikerketak ahotsa transformatzen duten gailu elektronikoak sormen motore gisa harturik pieza eszeniko bat ontzea zuen xede. Emaitza ikusteko aukera izango dugu.

Jarraian Bloñ musika taldearen kontzertua dator. Orain dela lau urte sortu zen proiektu hau Bañolet webseriearen inguruan. Paxkal Irigoyenek eta Maia Iribarnek idatzi eta zuzendu zuten ikus entzunezko pieza hori eta bide batez haren soinu-banda ere sortu. Horretarako sei musikari bildu ziren eta “Bañolet kantuz” grabazioa oinarri harturik zuzenekoak hasi dira plazaratzen. Lehen disko hau, musika giro desberdinen artean punpeka dabil; intimitatetik animalien mundu erora, pop argitsutik oihan ilunetara. Musika proposamen honek hamaika musikazale harritu eta emozionatu zituen pasa den EHZ festibalean. Ezustekoa hartzeko prest?

Zozketa: Martxoak 20, 14:30

Judit Neddermann

Judit Neddermannek zubi bat eraiki du Katalunia eta Euskal Herriaren artean. Rozalen, Jorge Drexler edo Joan Manuel Serrat musikariekin, besteak beste,  kolaboratu ohi duen sortzaile honek euskara unibertsoan jarri du jomugan eta “Artean” sei abestiz osaturiko lana kaleratu du. Bertan euskaraz kantatzen du eta euskal musikako erreferenteak diren kantariekin batera aritzen da. Izaro, Olatz Salvador, Maren, Idoia eta Bea Asurmendi bezalako ahotsekin ondu ditu grabazio honen kantak.

Neddermannen musikak hurbiltasuna, enpatia eta energia transmititzen du. Jatorriz kantak kantalaneraz idatzita daude eta Olatz Salvadorrek euskaratu ditu. Elkarbizitzan eta elkartrukean oinarritzen da lan hau, kultura biak elkarlotzen.

Esan bezala, euskaraz kantatuko du kataluniarrak eta hizkuntza biak uztartuko ditu eszenan. Ederra izango da eta saiatuko gara diskoan agertzen diren euskal kantari guzti horiek berarekin Guggenheimen eszenatokia partekatzen.

Gure hizkuntzen ospakizuna da, emakumeen bilkura eder honen bidez.

Zozketa: Martxoak 21, 14:30

Odola kantari

Unai Elorriaga eta Josu Aurrekoetxea

Beti esan izan da gai bi nagusi daudela literaturan: maitasuna eta heriotza. Mundu guztiak uste du, gainera, maitasunari buruz idatzi dela gehien. Ikuskizun honen bitartez, ordea, saiatuko gara erakusten ez dela guztiz egia. Asko kantatuko zaiola heriotzari, gerrari, hilketari, odolari. Odola beti kantari.

Hitzaldi-musikatuaren fomatuan, idazlea (Unai Elorriaga) eta musikaria (Josu Aurrekoetxea) arituko dira hainbat testu aztertzen eta kantatzen.

Ikus-entzunezkoek lagunduko dute kantuen ñabardurak ikusarazten. Ikuskizun dibertigarria, dinamikoa eta oso erakargarria da. Kultur transmisioan ezinbestekoa.

Zozketa: Martxoak 24, 14:30

Bob Dylan gurea

Audience + Belharra

Bob Dylan XX. medeko musika herrikoian eragin sakonena utzi duen abeslaria da. Seiehun kantutik gora sortu eta grabatu ditu berrogeitaka diskotan. Xabi Paya kulturgileak horietako 100 kanta euskaratu zituen eta baita argitaratu ere. 

Euskal Herriko bi bandak euskaratutako kanta xorta bat hartu eta Minesotako musikari handia moldatu dute geure erara. Kontzertu hau mundiala eta bakarra izango da!

Alde batetik, Gernikatik datorkigun Audience taldea dugu. Itzal luzeko musikari emankorrak. Beste aldetik, Belharra, kontzertu honetarako bildu den musikari saldo bat: Urbil Artola, Gorka Arranz, Julen Maestro, Jon Arzelus, Jose Mari Pulido eta Dani Venegas.

20 bat kanta entzuteko aukera izango dugu gitarrak, mandolina eta banjoen soinuen artean. Hainbat klasiko izango dira entzungai: “Ahaztu behingoz, ta kito”, “Libre izango naiz” “Garaiak aldatzen baitira”, “Iparraldeko neska”, besteak beste. Bukaeran “Zeruko atea joz” melodia mitikoak itxiko ditu aretoko ateak.

Zozketa: Martxoak 27, 14:30

Zizindurrunkarratz

Zinemagile batek (Oskar Alegria berak) bere herriko artzainek mendira egiten zuten transhumantzia bidea berreskuratzea erabaki du, baina ez du aurkitzen ibilbide zehatza adierazteko lekuko bizirik. Asto bat hartu eta ausardiaz bideari ekin dio.

Horrez gain, bere familiaren super-8 kamera zaharrarekin bidea filmatzea asmoa du. Baina 41 urte erabili gabe igaro ondoren, kamerak ez duela soinurik jasotzen konturatzen da. Ahaztutako bidea eta kamera isila bihurtuko dira, Paolo izeneko astoarekin batera, oroitzapenez, galderaz eta isiltasunez betetako bidaiarren protagonistak.

Oskar Alegriaren hirugarren film abangoardista da eta Japonian estreinatu zen. 2012an, “Emak Bakia Baita” aurkeztu zuen lehen film luzea. Man Rayk, artista surrealistak, “Emak Bakia” filma filmatu zuen euskal kostaldeko etxearen bilaketaren istorioa kontatzen du. 17 sari jaso eta 70 jaialditan parte hartu zuen. 

Bigarrena, berriz, “Zumiriki” izan zen 2019an. Loraldiatik igaro zuen luze honek zuzendariak bere haurtzaroko oihanean lau hilabetez isolatuta izandako esperientzia kontatzen du, presa baten eraikuntzak hondoratutako irla baten aurrean egurrezko etxola batean. Zumiriki Veneziako 76. Zinemaldiko Orizzonti sailean estreinatu zen nazioartean, 17 hizkuntzatara itzulia izan da eta Sevillako Europako Zinemaldian saritua izan zen. 

Zozketa: Martxoak 27, 14:30

Post-etorkizuna

Edorta Jimenez, Rafa Rueda, Amaia Agirre, Oihana Arana, Ane Labaka

Edorta Jimenezi eskatu diogu etorkizunari begira jartzea eta horren ondorioz narrazio original bat sortu du. Idazkia abiapuntua da ikuskizun hau ontzeko. Testu literarioarekin batera bi bertsolari (…), gai jartzaile bat (Amaia Agirre) eta musikari bat (Rafa Rueda) arituko dira eszenan. Etorkizunari buruzko narrazio labur hau kate begi bat da.

Orain arte Loraldiaren edizio guztietan arrakastatsu samar izen dena. Bertan literatura, musika eta bertsolaritza uztartzen dira eta datorren geroari begira paratzen gara. Geroa eta oraina gurutzatzen diren lekua izango da berriro ere Guggenheim Bilbao Museoaren auditorioa.

Sariduna: Amaia L M

OTS

HAATIK DANTZA KONPAINIA

Aiert Beobide, zuzendaria; Jone San Martin, koreografoa; Manu Gaine, soinua.

“Herri Gogoa” 1967an sortu zen zigilu diskografikoa da. Bere jatorria euskal kantu berriari estuki lotuta dago, bereziki “Ez Dok Amairu” taldeari. Haatik dantza konpainiak “Herri Gogoa” estudio-diskografikoa hartzen du abiapuntu eta diskoetxe horrek islatu zuen mugimendu kultural abangoardista berrinterpretatzeko bultzada gisa sortzen da. 

Zentsura zela eta, zigilu hori ez zen inoiz ofizialki existitu, baina berrehun disko baino gehiago argitaratzea lortu zuen, euskal kultura biziberritu eta berritzeko helburuarekin. Ehunka herritarren laguntza finantzarioari esker, proiektuak bizia hartu zuen.

“OTS” dantza garaikideko lan soil bat baino gehiago da; oroitzapenak asetzea, harritzea, gogora ekartzea eta, batez ere, mugimendu hark herri-kontzientzia bultzatzeko eta artea herriari hurbiltzeko izan zuen beharra transmititzea du helburutzat. Beste legatu baten gainean eraikitako ondarea, hain zuzen. Oinarria diskoetxe bat izanik, musika sortzeko lanean bertako doinuetan murgildu nahi dugu. Biniloak eskaintzen duten gordintasuna agertzeko eta era berean baita ikuskizun garaikide bat sortu.

Sariduna: Josu Garaio Ellakuria eta Miren Mendia Landa

Mila esker, Jonan Ordorika

HIRU TRUKU, ANARI, MICE – MIREN NARBAIZA, RAFA RUEDA, TAPIA TA LETURIA

Ikuskari honen bidez, Euskal Herrian aritzen diren soinu teknikari guztiak omendu nahi ditugu.

Jonan Ordorika iazko udan joan zitzaigun bat-batean. Kolpe latza izan zen euskal musikagintzan. Musikazale amorratua eta gurean izan dugun soinu teknikari emakorren eta maitatuenetako bat. Agertokietan nahiz estudioko mahaian langile porrokatua eta kontaezinak dira berarekin lan egin duten musikariak. Azkarate herrian Argiñenea baserrian zuen grabazio-estudioa. 1991. urtean Angel Katarainekin eta Amaia Apaolazarekin batera zabaldu zuten aipatutako grabazio-estudioa.

Itzalpean lan egiten zuen sortzaile apala izan da baina ezinbestekoa euskal musikagintzako hainbat ekoizpenen kalitatea ontzeko. Bere ekimenaz, 2014an, Lou Reeden kantak euskarara ekarri zituzten hainbat musikarik. Mila Esker izeneko lanean. Iparamerikar sortzailearen bisitaldia ere izan genuen Ordorikaren eskutik.

Loraldian sarritan izan dugu Jonan lanean soinu teknikari. Aitorpena merezi zuen eta hona hemen prestatu dugun ikuskizun handia. Bertan hamaika musikari lagun batuko dira eszenan.

Sariduna: Aitor Basterra

Iaiaiai irrintzi taldearen performancea eta Erraiak dokumentala ikusteko bi sarrera bikoitza

Aiaiai Aiaraldeko irrintzi taldearen eta Erraiak dokumentalaren emanaldia ikusteko bi sarrera bikoitzaren zozketa.

Binakako Serie B Txapelketako finalerdiak ikusteko sarrera bikoitza

Binakako Serie B Txapelketako finalerdien kanporaketa Orozkoko kiroldegian jokatuko dituzte Egiguren V–Bikuña eta Salaberria–Gaskue bikoteek alde batetik eta Zubizarreta III–Morgaetxebarria eta Senar– Eskiroz bikoteek bestetik.

Sariduna: Pablo Arbaiza Rubiera

Sormen Beken Jaialdiaz gozatzeko sarrera bikoitza

Sormen Beken Jaialdia egingo da datorren larunbatean (otsailak 22) Faktorian. Kultur Faktoriako sormen bekak irabazi zituzten sortzaileek prestatutako lanak ikusteko aukera egongo da bertan, arratsaldeko zazpietatik aurrera. Aiaraldea Komunikabideak sarrera bikoitza zozkatuko du ikuskizun sortaz gozatzeko.

Zozketaren data: Otsailak 21, ostirala, 15:00etan

'Pleibak' bertso saio literario musikatua

"Pleibak" eleberria argitaratu du Miren Amuriza Plaza bertsolari eta idazleak duela oso gutxi. Liburuaren aurkezpen sozial artistikoak egiteari ekin zion 2024ko abenduaren 1ean Berrizen (bere jaioterria), eta emanaldi gutxi batzuk eskainiko ditu Miren Narbaiza (Mice) musikaria eta Oihana Bartra zein Alaia Martin bertsolariak bidelagun. Faktorian egongo dira otsailaren 16an 18:00etan eta sarrera bikoitza zozketatu du Aiaraldea Komunikabideak.

Zozketa: Otsailaren 7an, 14:00etan

Irabazlea: Gaizka Aldama Gonzalez