Amurrioko Udalak baditu prest 2022rako aurrekontuak. Atzoko Udal Osoko Bilkuran onartu zituzten, EAJ eta PSE-EEren aldeko botoekin. 17.456.598 euroko plangintza ekonomikoa aurreikusi du tokiko erakundeak.
Aurrekontuak “pertsonak” jarriko ditu udal politiken erdian, diruaren %53 egongo baita zuzenean herritarrei bideratuta, Txerra Molinuevok nabarmendu duenez. Hiru helburu nabarmendu ditu alkateak:
- Pertsona ahulenen ondoan egotea.
- Kalitatezko zerbitzu publikoei eustea.
- Udaleko enplegu politikak bultzatzea.
“Azken 10 urteetako enplegu-partidarik handiena”
Ildo horretan, 330.254 euro bideratuko dituzte familiak zuzenean laguntzera, eta 30.000 euro, aldiz, gazteei alokairua ordaintzen laguntzera.
Enplegua sustatzeko 514.606 euro erabiliko dituzte (iaz baino 74.597 gehiago). Erantsi dutenez, azken 10 urteetako enplegu partidarik handiena izango da aurtengoa.
Elkarteei, aurrekontuaren %4,6a
Udal aurrekontuen %4,6a (806.872 euro) udalerriko elkarteen jarduna finantzatzeko baliatuko da, eta diru-partida aurreikusi dute baita Korrikari begira, martxoaren 31n herritik abiatuko baita euskararen aldeko ekimen ibiltaria. Horrez gain, tokiko erakundeak badu Kultura plan estrategikotik eratorritako jarduera ugari aurten egiteko asmoa.
Inbertsioak
2.902.535 euro bereiziko dira inbertsioetan, diru guztiaren %16,62. Hauek dira egingo dituzten proiektuak, besteak beste:
- Epaitegiaren inguruan aparkalekua eraikitzea.
- Aiara eta Frontoi kaleak oinezkoentzat prestatzea.
- Mendiko eta Zabaleko ikastetxe publikoetan eta Haurreskoletan inbertitzea.
- Kros zirkuitua egokitzea eta tirolina bat jartzea.
- Skate park-a eraikitzea.
Egitasmo horiek “estrategikotzat” jo ditu Molinuevok, “Amurrio eskuragarriago eta atseginagorantz aurrera egiteko”.
Horrez gain, beste inbertsio hauek ere aurreikusi dituzte:
- 168.867 euroz lagunduko dira udalerriko Administrazio Batzarrak.
- 340.000 euro bideratuko dira herritarren zuzeneko partaidetzaren bidez erabakitako ekintzetara. Horrez gain, 240.000 euro erreserbatu dituzte aurrekontu parte-hartzaileen bidez sortutako proposamenak gauzatzera.
- 100.000 euro erabiliko dira auzo batzarretan proposatutako jarduerak egiteko.
Oposizioaren jarrera
Orain Amurrio abstenitu egin zen aurrekontuen bozketan. EH Bilduk, aldiz, aurka bozkatu zuen, hainbat arrazoi argudiatuz.
Hemen ikusi daiteke plenoa osorik:
Udalak grafiko hauek prestatu ditu plangintza jendarteratzeko:
