Kui-kui ikuskizuna taularatuko dute Pirritxek, Porrotxek eta Marimototsek Amurrioko Bañueta kiroldegian, martxoaren 4an. "Emanaldi bakoitzean 1.500 lagunek izango dute ikusteko aukera", zehaztu dute. Izan ere, bi saio eskainiko dituzte: 17:30ean lehenbizikoa eta 19:30ean bigarrena. Berez, azaroaren 28an egitekoak ziren ikuskizunaren estreinaldia Amurrioko kiroldegian, baina bertan behera utzi zuen udalak, pandemiaren garapenagatik.
Korrika kulturalaren baitan eskainiko dituzte, ordea, oraingo saioak. Sarrerek 3 euro balioko dute, eta Kultura Etxean egongo dira salgai. Bi urtetik beherakoek, baina, ez dute ordaindu beharko. Hala ere, sarrera eskuratu beharko dute, aforoaren kontrola eramateko. Horrez gain, egunean bertan ere egongo da txartelak erosteko aukera Bañueta kiroldegian, adierazi dutenez.
Udazkeneko sarreren itzulketa
Amurrioko Euskara Zerbitzuek azaldu dutenez, udazkenean sarrera erosi zutenek txartel bera erabiltzeko aukera izango dute, zenbakien araberako kokapena eta txandak aintzat hartuta. "Ez doazenek, berriz, dirua berreskuratzeko aukera izango dute Kultura Etxera bertaratuta (astelehenetik ostiralera, 9:30-13:30 eta 16:00-20:00; eta larunbatean 10:00-14:00)", erantsi dute.
Zenbakien arabera finkatuko dira emanaldi ordua eta ikuslearen kokapena:
LEHENENGO EMANALDIA (17:30)
- Sarrera zuriak (pistak): 001-650
- Sarrera horiak (harmailak): 001-140
- Sarrera urdinak (harmailak): 001-120
BIGARREN EMANALDIA (19:30)
- Sarrera zuriak (pistak): 651-1300
- Sarrera horiak (harmailak): 141-239
- Sarrera urdinak (harmailak): 121-200