Ehunka emakume atera dira kalera Amurrion mugimendu feministak deitutako mobilizazioarekin bat eginez. Manifestazio jendetsu batek borobildu du Martxoaren 8rako herrian prestaturiko egitaraua.
Mugimendu Feministak zaintza-lanak jarri nahi izan ditu erdigunean aurtengo Martxoaren 8an
Mugimendu feministak zaintza-lanak jarri nahi izan ditu erdigunean aurtengo Martxoaren 8an. Lan horiek bizitzak sostengatzeko ezinbestekoak direla aldarrikatu dute. Desoreka izugarria dela azpimarratu dute, eta gaineratu dute sistema kapitalistak oinarria duela emakumeek euren bizkarretan hartzen dituzten zaintza-lan ez aitortuetan.
"Sortzen den enplegu pribatua erabat prekarioa da, lan baldintza zalantzagarri eta ziurtasun ezarekin. Lan honen gehiengoa emakume migratu eta arrazializatuek egiten dute. Zaintza sistema publikoan ere, zaintza merkantilizatzeko aukerak biderkatzen eta pribatizaziorako bidea irekitzen ari dira". Hala nabarmendu dute manifestazioaren amaieran egindako hitzartzean, eta aldarrikatu dute zaintzaren ardura kolektiboa izan behar dela. "Zaintza lanak aitortu eta birbanatu nahi ditugu, zaintza-eredu publiko eta komunitario bat garatuz".
Azaldu dutenez, eredu horrek ez du tokirik sistema kapitalistan. Horregatik, "zaintzaren paradisu artifiziala erre" eta "kapitalismo estraktibistarekin amaituko duen jendartea" eraikitzeko deia egin dute.