Iker Larrazabal Amurrioko frontoira itzuliko da gaur, eskupilotaren elitean aritzeko. Gazteak badauka eskarmentua, 2020an Aimar Olaizolaren aurka neurtu baitzuen bere trebezia toki berean. Baina gaurkoa era partida garrantzitsua izango da.
Izan ere, Buruz Buruko Promozio Txapelketan Larrazabalek ez du kale egiteko tarte handirik. "Finalaurdenetan bi multzo daude eta soilik lehenengoa eta bigarrena sailkatzen dira hurrengo kanporaketarako. Hortaz, beharrezkoa dut, gutxienez, bi partida irabaztea" adierazi dio kirolariak Aiaraldea Komunikabideari. Gaur bere aurkaria Egiguren V. izango da eta gero Alberdi II. eta Zabalarekin lehiatuko da.
Larrazabalek argi dauka bere helburua txapela irabaztea dela, baina, aldi berean, badaki profesional mailan guztiek dutela asmo hori: "Konfiantza daukat nire buruan, baina gauza asko hobetu behar ditut oraindik".
Halaber, amurriorrak azaldu du herrian jokatzeak baduela bere alde ona eta txarra: "Etxean eta zure ingurukoen aurrean lehiatzea oso berezia da, baina, aldi berean, urduritasuna sortzen du".
Urrutikoetxea eta Albisu, besteak beste
Iker Larrazabalek ez ezik, elitean dauden izen garrantzitsuek ere hartuko dute bihar frontoia. Hain zuzen, Urrutikoetxea-Aranguren bikoteak Peña II.-Albisurekin neurtuko ditu indarrak. Horrez gain, Bakaikoak Alberdiren kontra jokatuko du.
17:15ean hasiko da hitzordua eta interesdunek sarrerak eros ditzakete oraindik hemen.