Aurtengoan bai. Maiatzaren 22an Amurrioko Juan Urrutia parkean ospatu ahal izango da Txakolin Egunaren XXIII. edizioa. COVID-19ak agendatik ezabatu zuen jaia 2020an, eta iaz pandemia egoerak baldintzaturiko ekitaldi xumea egin zuten El Refor erretegian.
Aurten ohiko festa giroan aurkeztuko dute Arabako-Txakolina jatorri deitura osatzen duten sei upategiek, 2021eko uztaren emaitza. Upategietako arduradunak pozik azaldu dira lortutako produktuarekin: "urte lehorra izan da, eta mahatsari kostatu egin zaio heltzea, baina azken produktuaren kalitatea oso altua da".
Egun osoko egitaraua
Festa giroak goizetik arratsaldera hartuko ditu Amurrioko kaleak, eta bereziki Amurrioko parkea, hori izango baita egitarauaren erdigunea.
11:30etan, Udalbatza aretoan eskainiko duten ohorezko aurreskuarekin eta 2021eko uztaren aurkezpen ofizialarekin emango diete hasiera jarduerei. Bertan izendatuko dute 2022ko Arabako Txakolinaren enbaxadore berria: Maite Eskarmendi, EITBko kazetaria.
12:00etan txupinazoa jaurti, eta orduan bai, Juan Urrutia Parkean kokatua egongo den jai-barrutiak ateak zabalduko ditu. Arabako zein Euskal Herriko beste lurraldeetako txakolinak dastatzeko aukera egongo da bertan.
Gastronomia eskaintza zabala izango da ere. Ohi bezala Euskolabel zigiludun produktu ugari dastatzeko aukera egongo da: Euskalparrillak sukaldatutako baserriko oilaskoak eta txerri sahieskiak, Izoriako gazta, Burutxaga harategiko odoloste eta txistorra edota Ekotaloren talo ekologikoak.
Elexalde kalean Artisau-produktuen erakusketa eta salmenta atonduko dituzte. Guk eskulturan, ordea, Arabako txakolinarekin egindako Aiaraldeko Garrafa dastatzea eskainiko dute.
Jai-giroa nagusi
Musikarik ez da faltako. Kalejira desberdinek girotuko dituzte kaleak. 17:00etan, aldiz, Erruki Erromeriak kontzertua eskainiko du parkean, arratsaldeko 19:00ak arte.