Amurrioko Bowla larunbatean inauguratuko dute ofizialki eta jai garrantzitsua prestatu dute horretarako. Amurrioko Udalak ekimena lagundu eta finantzatu badu ere, Andima Errazti izan da ekintzak pentsatu dituena eta, bere ustez, "aukera paregabea izango da kirolari profesionalak ikusteko".
Izan ere, Erraztik munduko BMX txirrindulari eta skater apartak gonbidatu ditu: Teresa Fernandez Munduko Txapelduna izan da, eta Ian Ponciano Bermeoko gaztea ere munduko txapelketan aritu da, eta Sergio Layosek ere ibilbide oparoa egin du nazioartean.
Aipatzekoa da ere Danny Leonek frogatuko duela kirol azpiegitura. Madrildarra Tokioko Joko Olinpikoetan egon zen eta 9. postua eskuratu zuen Japonian.
Edonola ere, Erraztik goraipatu du bowl berria jende ororentzat instalatu dela eta, horregatik, lagunarteko lehiaketa herrikoia egingo dute 17:00etatik 21:00ak arte. Horrek "giro ona" sortuko duela uste du amurrioarrak. Ruben Alvarezek egingo ditu esatari lanak.
Behin lehia hori amaituta, Sabin Guarestik kontzertua eskainiko du eta 22:00etan Aiaraldeko Soinu Sistemaren txanda helduko da.
Elkartasunerako tartea
Ondo pasatzeaz gain, elkartasuna eta kirola presente izan nahi dute bihar eta horretarako txosna jarriko dute eta kamisetak salgai egongo dira. Batzen den diru guztia Share a bike, share a smile Gobernuz Kanpoko Erakundera bideratuko dute. Talde alemaniarrak herri txiroetara bidaltzen ditu BMX bizikletak, umeentzat.
4 urteko ahalegina
Andima Erraztik aipatu dio Aiaraldea Komunikabideari bowl berria lortzeko ideia duela 4 urte hasi zela: "Parte hartzerako aurrekontuen deialdian aurkeztu nuen ideia. Une horretan baztertu zen, baina gero diseinua egin nuen enpresa batekin eta Amurrioko Udalak gauzatu du ekimena".
Berez, larunbateko inaugurazioa ofiziala bada ere, jadanik hainbat kirolarik erabili dute azpiegitura berria eta, esaterako, pasa den astean Frantziako Estatutik 30 lagun etorri ziren Amurriora tokia probatzeko. ·"Gogoko izan zuten", ziurtatu du Erraztik.