Aztarna etnografia elkarteak jardunaldiak egingo ditu lehenengo aldiz urriaren 4tik 6ra bitartean. Hitzaldi guztiak Katekesi Aretoan izango dira eta 19:00etan abiatuko dituzte.
Solasaldi guztiek harremana dute Amurrio eta inguruetako historia eta ohiturekin. Horrela, hitza hartuko duen lehenengo aditua Salvador Velilla izango da. Udaleko kultura arduraduna izandakoak landuko du Nerbioigoienako txakolinaren historia.
Hurrengo egunean Ramon Zurimendi Aztarna elkarteko presidentearen txanda helduko da eta historialariak azalduko du Refor eraikinaren bilakaera, 102 urte bete baititu.
Azkenik, Juanjo Hidalgo arkeologoak Elexazar aztarnategian egindako indusketetan topatutakoaren berri emango du. Amurrioko ingurune horretan Erromatar garaiko herrixka baten arrastoak ikertu ditu Hidalgok hainbat kanpainatan.
Aztarna elkartearen lehenengo jardunaldiak hauek izango adira ere, ezin da ahaztu taldeak lan handia egiten duela; aldizkaria argitaratzen du, museo etnografikoa dute Reforren eta indusketak eta ikerketak sustatzen dituzte. Horrez gain, Gerra Zibilari buruzko liburua argitaratu zuten.