Aurrera doa Saratxon 3.000 metro karratuko eguzki-parkea eraikitzeko prozesua. Hala adierazi dio Iñigo Ansola Kareagak Aiaraldea Komunikabideari. Euskal Energia Erakundeko zuzendaria Amurrion egon zen iragan azaroaren 10ean, eta bertan egin zituen adierazpenak.
Ansolaren arabera, Europako Funtsen dirulaguntza deialdi batera aurkeztu zituzten Ekiola egitasmoaren barruan dauden 11 proiektuak, Saratxokoa barne; baina, horietako bostek baino ez zuten finantzaketa lortu. Saratxokoa kanpoan geratu zen, Amurrioko udalerriak deialdian ezarritako gehienezko biztanleria gainditzen duelako.
Hala ere, Euskal Energia Erakundeko buruak aurreratu zuen atera berri dela bigarren deialdi bat, eta horretara aurkeztuko dutela berriz egitasmoa. Oraingoan espero dute dirulaguntza jasotzea eta, modu horretan, ekimena 2023an abiatu ahal izatea. Ansolaren hitzetan, 650.000-750.000 euro arteko laguntza jasotzea aurreikusi dute.
Proiektuak aurrera egingo balu, 1.818 plaka fotobolkaiko jarriko lituzkete guztira, eta bertatik lortutako energia norbanakoen etxebizitzak hornitzeko baliatuko litzateke. Bazkidetza kanpaina egingo dute horretarako, etxebizitzak “alokairuan edo jabetzan” dituzten herritarrak proiektura batu daitezen. “Energia gehiago ekoiztuko balitz, tokiko komertzioei ere luzatuko litzaieke batzeko aukera”. Ansolaren hitzetan, ez dute aurreikusten energia hori kanpoko enpresei saltzea.
30 ingurumen teknikariren kontratazioa
Arestian esan bezala, Amurrion egon ziren iragan astean Euskal Energiaren Erakundeko ordezkariak, Ihobe sozietate publikoko kideekin batera. Tokiko erakundeei bideratutako aurkezpena egin zuten Kultur Etxean, “Erreminta kutxa” aurkezteko. Aiaraldeko hainbat alkate, zinegotzi eta teknikari bertaratu ziren ekitaldira.
Baliabide sorta plazaratu zuten bileran, helburu berarekin: udalei laguntzea klima-aldaketaren, energiaren eta jasangarritasunen esparruei lotutako politikak garatzen.
Ekimen berri baten berri ere eman zuten: 30 ingurumen-teknikariren kontratazioa sustatuko dute, urtebetez. Praktika-kontratuak egingo dizkiete, eta euren lana garatzeko materialak eman. Lanbiderekin eta Novia Salcedo fundazioarekin elkarlanean garatu dute egitasmoa, Europako Funtsak baliatuta.