Jose Mari Basualdo Sari Nagusiaren II. edizioa lehiatuko da larunbatean eta antolatzaileek 300 txirrindulari ingururen parte hartzea espero dute. Izena emateko epea bihar amaituko da eta Espainiako Txirrindularitza Federazioaren webgunean egin daiteke.
09:30etatik aurrera kokatuko dira kirolariak Reforreko ibilbideko irteeran eta gizonezkoen Master 40-50-60 kategoriekin hasiko dira. Gero, 10:30ean, gizonezko eta emakumezko kadeteen ordua helduko da. 11:15ean eskola kirolariek izango dute protagonismoa eta 12:30ean gizonezkoen juniorrek eta emakumezko elite, sub-23, junior eta masterrek. Azkenik, 13:30ean gizonezkoen elite, sub-23 eta Master 30 kategoriakoak arituko dira.
Tokikoen garaipenak iaz
2021eko abenduan egin zen aurreko Jose Mari Basualdo Sari Nagusia eta tokiko kirolariek eman zuten zeresana. Lukene Trujillanok junior kategorian irabazi zuen eta Hodei Muñozek kadeteen artean. Horrez gain, Iñaki Guarestik, Asier Berazak eta Iñigo Uriak ere zapaldu zuten podiuma.
Jose Mari Basualdo
Luiaondoko txirrindulariak ziklokrosean egin zituen bere lasterketa onenak, munduko bigarren sailkatu baitzen. Baina errepideko txirrindulari profesionala ere izan zen. Ibilbide oso gorabeheratsua izan zuen, lesioen zein politika frankistaren ondorioz (zerbitzu militarrak bere jarduera eten zuen, berak azaldu zuen moduan). Edonola ere, palmares garrantzitsua lortu zuen.
Basualdok 3 aldiz irabazi zuen Espainiako Ziklokros txapelketa (1972an, 1973an eta 1976an) eta Munduko Txapelketan 2. postua eskuratu zuen 1970ean eta 5. izan zen 1972an. Gainera, KAS talde profesionaleko txirrindularia izan zen 1971etik 1976ra bitartean. Orotara 80 lasterketa inguru irabazi zituen bere bizitzan.