PINE Instalaciones y Montajes enpresako langile batzordeak prentsa oharra zabaldu du salatzeko astelehenean Tubos Reunidos enpresan gertatutako istripua.
Hasteko, argitu dute ezbeharrak bi behargin kaltetu zituela, baina baten kasuan ondorioak askoz larriagoak direla: "Gurutzetako Ospitaleko erredura larrien unitatean dago, eta esan dietenaren arabera, ez dago bizia galtzeko arriskuan, baina istripuak ondorioak utziko dizkio, eta sendatzeko prozesua luzea eta zaila izango da".
Halaber, azaldu dute beste langileak zorte hobea izan zuela, sendaketak fabrikan egin ahal izan zizkioten eta, mutuatik igaro ondoren, etxera bidali zuten.
Bien kasuan, babesa adierazi nahi izan diete, eurei zein euren haien senideei, lagunei eta lankideei ere, eta azkar osatzea opa diete.
Informazio falta
Lehenik eta behin, PINEko langile ordezkariek salatu dute istripua gertatu izana, baina nabarmendu dute informazioa ez zaiela eskaini segurtasun-batzordearen bitartez: "Beste kanal batzuetatik izan dugu horren berri".
Horregatik, exijitu dute ikerketa sakona egitea eta beharginen ordezkariek parte hartzea. Istripuak gerta ez daitezen, prebentzio neurriak eta trebakuntza eskatu dituzte: "Istripu larri bat baino gehiago izan dugu eta heriotza ekarri duenik ere bai".
Hori guztia dela medio, ostiralean elkarretaratzea egingo dute Zamudioko Ugaldeguren II industrialdean, 14:30ean.