Lan istripu larria jazo zen atzo Tubos Reunidosen, ELAk jakinarazi duenez. Sindikatuaren aburuz, 14:30ak aldera izan zen ezbeharra, tentsio handiko lanabesak zeuden eremu batean. 53 eta 58 urteko bi behargin zauritu ziren, eta horietako bat "oso larri" dago.
Biak ala biak zeuden Pine Instalaciones y Montajes enpresa azpikontratatuarentzat lanean, eta mantenu eginkizunak gauzatzen ari ziren fabrikan. ELAk jakinarazi du informazio gehiago biltzen ari dela gertatutakoa argitzeko.
Iturri sindikalek Aiaraldea Komunikabideari aipatu dietenez, oso larri dagoen beharginak lehen graduko erredura ugari ditu gorputzean. Atzo Ertzaintza, larrialdi zerbitzuak eta Osalan bertaratu ziren lantegira, eta gertatutakoa ikertzen ari dira.
Aurtengo lan heriotza eta istripuak
2023an sei langile hil dira Hego Euskal Herrian lan istripuen ondorioz. Lehen lan heriotza Izarran izan zen. Bakarrik lanean zegoen Laudioko bizilagun bat zendu zen herri horretako Kutxabankeko bulegoan, bihotzeko baten ondorioz. Duela astebete, aldiz, lan istripua izan zuen Erretes Lantenon baso lanetan ari zen behargin batek. Ondorioz, aurtengo hirugarren lan istripua da Tubos Reunidosekoa.