Mikel Urrutikoetxeak Binakako Txapelketa profesionala jokatuko du asteburuan, bizkarrean zituen minak gainditu baititu. Ondorioz, Iker Larrazabal amurrioarra promozio mailan lehiatuko da berriro, berak ordeztu baitzuen Zaratamoko kirolaria.
Larrazabal pozik dago eta Aiaraldea Komunikabideari adierazi dio bere ohiko kategorian dena emateko jokatuko duela.
Hori bai, azken hiru asteetan izandako esperientzia oso berezia izan da amurrioarrarentzat. Pasa den asteburuan Altuna III. pilotariaren aurka neurtu zituen indarrak eta, nahiz eta berak eta Albisuk partida galdu zuten, gustura geratu zen Larrazabal: "Pena izan zen galtzea eta puntua ez eskuratzea Urrutikoetxearentzat, baina nik %100 eman nuen eta Albisuk izugarri lagundu ninduen. Hala ere, Altunaren kontra jokatzea ametsa betetzea izan da, ez da egunero egin dezakezun zerbait".
"Altunaren kontra jokatzea ez da zerbait egunero egin ahal dena. Ametsa bete izan dut", adierazi du Iker Larrazabalek.
Berez, Larrazabalek partida ona egin zuen eta 22-19 bukatu zen norgehiagoka. Altunak bazuen finalerdiak jokatzeko txartela, baina ahalegindu zen beste puntu bat gehitzen eta kontzentrazio eta indar guztiak behar izan zituen horretarako.
Hiru partida
Guztira, hiru partida jokatu ditu Amurrioko pilotariak eta bakarra irabazi du, Rezusta eta Etxebarriaren kontra jokatutakoa, hain zuzen.
Dena den, aintzat hartu behar da beste bi norgehiagokak Binakako Txapelketa profesionaleko ligaxkako lehen bi sailkatuen aurka izan direla eta emaitzak estuak izan direla. Esaterako, Elordi eta Zabaletaren partida, sailkapeneko buruen kontrakoa, 22-16 amaitu zen eta Larrazabalek 13 puntu egitea lortu zuen.