Omenaldi hunkigarria bihurtu da aurtengo Urrezko Guk Saria. Iñaki Bea Jauregik jaso du aurten aitortza hori, eta lagun zein senide ugari bertaratu dira Amurrio Antzokian eginiko ekitaldira. Musika emanaldi labur baten ostean ekin diote Amurrioko futbol jokalari ohi eta entrenatzailearen ibilbidea laburtzeari, bideo erreportaje zabal baten bidez. Bertan, bere lankide, senide zein lagunek hartu dute hitza, kirolari omenduarekin batera.
Txerra Molinuevo igo da ondoren oholtzara. Amurrioko alkateak Bearen kirol ibilbidea goraipatu du bereziki, eta Amurrio mapan kokatu izana eskertu dio.
Ondoren hartu du hitza omenduak. Aurreko urteetan Urrezko Guk Saria jaso duten elkarteen lana goraipatu du lehenbizi. "Herriaren alde egin dute lan modu desinteresatuan. Nik, aldiz, puntu batera arte, esan daiteke nire alde egin dudala lan". Oso lagunarteko hitzartzea egin du, umore eta anekdotez betetakoa, eta esker zein laudorio ugari eskaini dizkie bere guraso, senide eta lagunei.
🎥Iñaki Bea Jauregi futbolari eta entrenatzaileak jaso du Urrezko Guk Saria, lagun eta senidez inguratuta 👇👇👇 pic.twitter.com/oTCZQ1iwlB
— Aiaraldea.eus (@aiaraldea) March 18, 2023
Jarraian eman diote Urrezko Guk Saria, baina omenaldia ez da hor amaitu. Bearen kuadrillako kideak igo dira oholtzara. Txapela bat jarri diote buruan, eta bere hainbat bertute "ezezagun" aipatu dituzte, jokalari gazteekin edota pertsona migratuekin izandako elkartasun keinuak, kasu.
Gaurkoa ez da izango Beak jasoko duen aitortza bakarra. Ekitaldian aurreratu dutenez, Amurrioko Jaietako aurtengo pregoilaria izatea egokituko zaio.
