Bi eraso matxista jazo dira Amurrioko jaietan, Mugimendu Feministak jakinarazi duenez. Otsemeak taldeko kideek Aiaraldea Komunikabideari adierazi diotenez, bi erasoren berri izan dute azken egunetan. Lehenbiziko kasua festetan zehar abian dagoen salaketa telefonoaren bidez jaso dute, eragilearen esanetan. Hain zuzen, Amurrioko jaietan zehar 24 orduko arreta eta zaintza ekimena jarri dute abian, eraso matxistarik jasan edo ikustekotan salatzeko: 666 167 220 telefono zenbakia. "Txupinazo egunean, abuztuaren 12an, gertatu ziren salatutako bi erasoak".
"Txupinazo egunean, abuztuaren 12an, gertatu ziren salatutako bi erasoak"
Larunbatean izan zen Amurrioko Jaietako txupinazoa, eta egun bat lehenago abiatu zituzten festak Jai Herrikoien Aldeko Batzordetik.
19:00etan, elkarretaratzea
Amurrioko sare eta eragile feministek mobilizaziorako deia zabaldu dute sare sozialen bidez, adostutako protokoloari jarraiki. Hala, Amurrioko Emakumeon* Sareak, Otsemeakek eta Mugimendu Feministak deitu dute gaur iluntzeko elkarretaratzea Juan Urrutia plazan.
Amurrioko Udalak ere sare sozialen bidez babestu du mobilizazioa: "Amurrioko Udalak bat egiten du Mugimendu Feministak, Otsemeak eta Emakumeon* Sareak gaur arratsaldeko 19:00etan Juan Urrutia plazan asteburu honetan Amurrion izandako bi eraso matxistak gaitzesteko deitu duen elkarretaratzearekin. Ez ezetza da! Beti".
