Gaur Leticia Jimenez Ahal Dugu alderdiko Amurrioko alkategaiak berriz salatu du 07:40ean Gasteizera doan autobusa berandu heldu dela herrira. Berak Arabako hiriburuan lan egiten du eta zerbitzuaren ohiko erabiltzailea da.
Jimenezek azaldu du 25 minutu berandu agertu dela garraio publikoa eta horrek ibilgailu pribatua hartzera derrigortzen dituela hiriburuan lan egiten duten beharginak.
Alavabus enpresak berak sare sozialen bidez erantzun dio amurrioarrari eta konpainiak onartu du atzerapenak gertatzen ari direla, erabilera areagotu delako.
Halaber, enpresak adierazi du aldaketak egingo dituztela hori ekiditeko. Zehazki, urriaren 30etik aurrera zenbait ordutegi aurreratuko dituzte. Barkamena ere eskatu du Alavabusek.
Ez da lehenengo aldia Jimenezek publikoki adierazten duela zerbitzua ez dela behar den moduan betetzen. Hain zuzen, irailaren amaieran zabaldu zuen hamabost bidaiari Amurrion geratu zirela autobusean tokirik ez zegoelako.
Kasu horretan ere Arabako Foru Aldundiak zerbitzua indartu zuen, baina Jimenezek eurak zalantzan jarri zuen eraginkorra izango ote zen neurria.