Peio Rivas mago laudioarra erronka berrien bila dabil eta hurrengoa Amurrio Antzokian izango da, abenduaren 16an 19:00etan. Izan ere, egun horretan gala egingo du Alejandro Revuelta, Hodei, Hector Sansegundo eta Ruben Diaz magoekin batera. Sarrerak salgai daude jadanik hemen.
Berez, hitzordu berezia izango da Peio Rivasentzat. Hain zuzen, eskualdean lehenengo aldiz taularatuko du hainbat sari ekarri dizkion ikuskizuna. Azkena Letonian jaso zuen, urrian.
Kide horiek hautatuta, Rivas saiatu da magiaren diziplina anitzak eskaintzen: "Karten manipulazioa lantzen dut nik, eta hainbat sari ekarri dizkidan ikuskizuna egingo dut lehenengo aldiz Aiaraldean. Hector Sansegundo segoviarrak magia komikoa landuko du, Hodei nafartarrak aurkezle lanak egingo ditu eta magia komikoa ere jorratuko du. Zaragozako Ruben Diazek ‘ilusio handiak’ generoan sartuko gaitu, gailu handiekin. Alejandro Revuelta, ordea, Santanderretik etorriko da eta mentalismoa jorratuko du".
Abenduan eta hurrengo urtean aukera gehiago egongo dira Peio Rivasen trebeziaren lekuko izateko, baina Amurriokoa aukera bakarra izango da bere ikuskizun sarituaz gozatzeko: "Laudiora etorriko naiz Kasinora pare bat egun; abenduaren 29an eta urtarrilaren 4an, eta ikuskizun berri bat plazatatuko dut bertan. Hortaz gain, hainbat gala ditut Zaragozan, Errenterian, Zarautzen, Artziniegan, Okondon… Eta bidaia bat agian oso urrunera. Ezin dut esan ezer momentuz".