Amurrioko Udaletxean elkartu dira gaur Amurrio Trail Taldeko, Down Sindromea Fundazioko, Udal Gobernuko eta tokiko merkataritzako kideak, asteburuko ekimen solidarioaren berri emateko. Urtero bezala, eta herriko trail taldeak antolatuta, Babio mendira igoera prestatu dute.
Bi dira elkartasun ekimeneko hitzorduak. Alde batetik, abenduaren 23an, 18:00etan, abiatuko duten 16 ordu non-stop erronka. Bestetik, biharamunean Juan de Urrutia plazatik abiatuko den VII. martxa herrikoia.
Olentzerok ere parte-hartuko du asteburuko ekimenean, horrela adierazi baitu Amurrioko udalbatza aretoan egindako agerraldian.
Down Sindromea Fundazioaren alde
Aurtengo edizioan Down Sindromea Fundazioa lagunduko dute ekonomikoki. Babio mendira egindako igoera bakoitzeko 5 euro bideratuko dira Down Sindromea bezalako gaitzekin lan egiten duen elkartera. Non-stop erronkan, gainera, nahi duen elkarte eta negozio orok 30 euroko prezioan hauspotu ahalko du igoera bat. Honezkero hainbat elkarte animatu dira hori egitera, Amurrio Trail taldeak sare sozialetan azaldu duenez.
Kirol erronkan parte hartu gabe ere egongo da diru ekarpena egiteko aukera. Trail taldeak txosna solidarioa jarriko du larunbat gauean Juan Urrutia plazan, eta fundazioari emango diote bertan bildutako diru guztia. Larunbat gaua girotzeko, gainera, Lehian erromeriak kontzertua eskainiko du toki berean.