Garikoitz Ibarrola amurrioarra 2020ko martxoaren 15ean zendu zen, COVID-19ak eragindako konfinamendua hasi berritan. Salbuespenezko egoera tarteko, ezinezkoa izan zen senide eta lagunentzako agur omenaldi bat eskaintzea. Hori dela eta, Raku Eguna antolatu dute datorren martxoaren 16an, "Gari behar bezala agurtzeko".
Egun osoko egitaraua
Martxoaren 16rako egun osoko egitaraua prestatu dute Gariren lagunek. Mendi irteera batekin abiatuko dituzte jarduerak. 9:00etan Amurrioko Telefonikatik abiatuko dira, eta 9:30ean Lezamako Bideko jatetxe aurrean batuko dira gainerako parte hartzaileekin. Mendi ibilaldia Txibiarteko tontorreraino igoko da, bertan Gariren omenez jarritako arranoa bisitatzeko, eta jarraian Gariren monolitoaren inguruan egingo dute hamaiketakoa.
Herrira bueltatzerakoan bazkaria egingo dute Juan Urrutia plazan. Otorduko txartelak martxoaren 10era arte egongo dira salgai Amurrioko Biderdi, Txokogorri eta Ganbara tabernetan, Laudioko Drumgorri aretoan eta Orozkoko Itxina tabernan.
Aiaraldeko Soinu Sistemaren musikarekin eta briska txapelketarekin girotuko dute bazkalostea. Arratsaldean, aldiz, musika-poteo batek zeharkatuko ditu Amurrioko kaleak.
Egunari kontzertuekin emango diote amaiera. 21:30etatik aurrera Zutik! eta Habemus Papam taldeak igoko dira oholtza gainera. Festa-giroa musika jartzaile batekin luzatuko dute. Gainera, kontzertuak iraun bitartean, elkartasun txosna jarriko dute. AEFAT elkarteari eta Galder Babrado presoaren senideei emango diote bertan bildutako dirua.
Abestia
Zutik! taldea izan da egunari soinu banda jartzeaz arduratu dena. Gariren omenezko abestia ekoitzi dute: Izarren iraultza. Azaldu dutenez, egun gutxitan sortu zuten kanta, eta Burubio Elkarteko estudioetan grabatu zuten. Habemus Papameko kideen eta Gariren senideen laguntza jaso dute abestia osatzeo.
"Beti laguntzeko prest"
Pertsona ezaguna zen Amurrion Garikoitz Ibarrola. Horren erakusgarri dira pandemia betean zendu zenean Ibarrola agurtzera balkoietara azaldu ziren dozenaka herritarrak. Amurrioko elkarte ugaritan ibilitakoa izan zen Gari: Mendiko Lagunak, Herriarenak Jai Kuadrilla, ehiza elkartea... Ekintza ugaritan ere aletxoa jarri zuen. "Beti zegoen laguntzeko prest" gogoratu dute bere senideek.