Ehundik gora lagun bildu ziren ostegunean Amurrioko anbulatorioaren aurrean, duela hilabete bat baino gehiago abian jarritako erreklamazio kanpainari Osakidetzak emandako erantzuna salatzeko.
Iragan apirilaren 10ean agerraldia egin zuten hainbat bizilagunek Laudioko osasun zentroaren aurrean. Osasun sistema publikoan ematen diren “eskubide urraketak” salatzeko deia egin zuten bertan, eta hainbat erreklamazio tramitatu zituzten, azken hilabeteetan eskualdeko Etengabeko Arreta Guneak hainbat aldiz medikurik gabe egon direla salatzeko.
Ordutik hona, beste hainbat norbanako eta eragilek ere egin dute bat kanpainarekin. Laudioko pentsiodunek, adibidez, erreklamazio kolektiboa egin zuten.
Atzoko agerraldian, aldiz, salatu zuten Osakidetzak erantzun egin diela jarritako erreklamazio batzuei, baina “aitzakia bera” erabili duela kasu guztietan: “medikuen eskasia dagoela eta, horregatik, baja batzuk, ‘ahaleginak egin arren’, ezin direla familia-medikuntzako profesionalekin bete; eta kasu horietan, ‘arreta mediku atzeraezina’ behar izanez gero, ‘egokiena den zentrora’ joatea beste erremediorik ez dugula”.
Osakidetzak erantzun egin die herritarrek jarritako erreklamazio batzuei, baina “aitzakia bera” erabiliz, atzoko agerraldiko kideen ustetan.
Agerraldian parte hartu zuten bizilagunen hitzetan, horrek esan nahi duena da Osakidetzak ez duela “ezer konponduko”, eta herritarrak direla “egoera berrira ohitu” beharko direnak.
Horren aurrean, atzoko agerraldian nabarmendu zuten ez zirela “Osakidetzaren aitzakiekin” konformatuko, eta mobilizatzen jarraituko zutela ziurtatu zuten, jasotako erantzunak paper-birringailu batean sartzen zituzten bitartean.
Aiaraldeko gainontzeo herritarrei, aldiz, borrokara batzeko deia luzatu zieten: “Gazte, ikasle, langile, pentsiodun… zabaldu mezu hau zure inguruan, hurbildu asanbladetara edo egin zure ekarpena mobilizazioetara etorriz. Guztion esku dago denona den osasun sistema babestea”.
Berriro ere medikurik gabe Amurrion
Agerraldian bertan aipatu zutenez, mediku gabeziak eguneroko arazoa izaten jarraitzen du eskualdeko anbulatorioetan. “Iragan larunbatean hemen, Amurriokoan, egon ziren berriz medikurik gabe”, aipatu zuten. Gauzak hala, “erreklamazioen kanpainako indarrak biderkatzera” deitu zituzten bertaratutakoak.