Mendiko Eskolako zortzi umeren familiak Orozkon bizitzen ari diren egoera berean daude. Hau da, euren eskola garraioko linean ez dago autobusik eta Hezkuntza Sailak taxi zerbitzua kontratatu du haurrak ikastetxera eramateko.
Ibilgailuak, ordea, sei plaza baino ez ditu eta, ondorioz, bi bidaietan eramaten dituzte Administrazio Batzarreko eta herrigunetik urrun dauden auzoetako adingabeak. "Ez gaude soilik autobusik gabe, begiralerik gabe ere bagaude, gainera. Bidaian ez dago begiralerik", salatu du familietako batek.
Autobus bidaiak begiralerik gabe egiten dituztela ere salatu du gurasoetako batek
Gauzak horrela, umeak bi taldetan heltzen dira Mendiko Eskolara eta lehenengoak ordu erdi inguru itxaron behar du, begirale batekin.
Edonola ere, gurasoek azpimarratu dute eguraldi euritsua egonez gero, begiraleak ezingo dituela ume horiek zaindu, eskolara helduko direnak laguntzeko beharra izango baitu. "2 urteko gelako irakasleek hartu dute konpromisoa kasu horietan euren klaseetara sartzeko, baina borondate onez hartutako neurria izango da. Ez da benetako konponbidea izango", aipatu dute familiek.
Horrez gain, adingabeen senideek adierazi dute ez dutela inolako informazio ofizialik garraioari buruz, eta ez dakitela zergatik aurten ez duten autobus zerbitzurik.