Iaz bezala, Orozko Eskolako eta Laudio Institutuko zenbait ikaslek arazoak dituzte ikastetxeetara joateko orduan, autobusik ez dagoelako. Gazte horiek udalerriko auzunetan bizi dira eta bi oztopo mota topatu dituzte, Hezkuntza Sailak oraindik ez dituelako euren lineatan garraio enpresak kontratatu.
Orozkoko Eskolako haurrei dagokienez, guraso batek salatu du igandean bertan jakin izan zutela ez dagoela, iaz bezala, autobus bat udalerriko auzunetan bizi diren bederatzi umeei zerbitzua emateko. Antza, taxia eskainiko diete, baina momentuz zerbitzu hori ez da heldu eta gurasoek eurek garraiatu behar dituzte hezkuntza zentrora. Halaber, orozkoarrek ez dute jakinarazpen ofizialik egoerari buruz.
Horrez gain, familiek kritikatu dute taxiak ezin dituela ume guztiak aldi berean hartu, ez duelako plaza nahikorik. Hortaz, adingabeak bi bidaietan heldu behar dira eskolara. Horrek esan nahi du batzuk oso goiz heltzen direla ikastetxera eta ordu erdi inguru egon behar direla han itxaroten. Itzuleran, aldiz, kontrakoa gertatzen zaie; ordu erdi edo gehiago itxaron beharko dutela eskolan etxera joan ahal izateko.
Gauzak horrela, senideek exijitu dute autobus zerbitzua berriro ezartzea, iaz bezala.
Laudio Institutuko Orozkoko hainbat ikaslek ordubete galtzen dute egunero itxaroten. Horrez gain, Orozkoko auzune batzuetako haurrek ez dute garraiorik eskolara jaisteko, eta momentuz gurasoek hartu behar izan dute lan hori
Laudio Institutuan ere arazoak
Laudio Institutuan ere antzeko oztopoak salatu dituzte. Ikastetxeko zuzendaritzak arazo bera eta gehiago topatu zituen pasa den astean.
Alde batetik, Hezkuntza Sailak kontratatutako autobusa nerabeak garraiatzeko Orozkoko herrigunetik Laudiora ez zuen plaza nahikorik. Ibilgailuak 55 eserleku inguru zituen eta ikasleak 60 baino gehiago dira. Laudio Institutuko zuzendaritzaren kudeaketen ondorioz, arazo hori konpondu zuen Hezkuntza Sailak.
Bestalde, Orozkoko auzoetako hamahiru ikaslek taxiz joan behar dute ikastetxera. Ibilgailuak zortzi plaza baino ez dituenez, batzuk oso goiz heltzen dira institutura eta ordu erdi inguru daude barruan klaseak hasi arte. Behin klaseak amaituta, jadanik ordu erdi itxaron dutenek, beste ordu erdiko itxaronaldia dute. Izan ere, euren auzoak dira hurbilenak, eta aldrebez eginda, bidaien prozesu osoa luzeagoa litzateke.
Institutuaren kasuan ere, iaz linea horri autobus txiki batekin ematen zioten zerbitzua. Gurasoek zein zuzendaritzak dakitenez, enpresek ez dute prestutasunik agertu ibilbide hori euren gain hartzeko, azken urteetan Hezkuntza Sailaren eta garraio enpresen artean izandako talken ondorioz.